Astana qalasyndaǵy №2 Esil aýdandyq sotynda Seıitqazy jáne Áset Mataevtardyń isi boıynsha sot otyrysy odan ári jalǵasýda. Búgingi otyrysta sotqa túsinik bergen Seıitqazy Mataev salyq tóleýde qatelikter jibergenin, sonyń nátıjesinde mıllıondaǵan somany tóleýden jaltarǵanyn moıyndady.
«Barlyq esep-qısap jumystarymen meniń marqum dosym – Aleksandr Qımasov aınalysty. Ol ótken jyly 21 qyrkúıekte Máskeýde aýyr naýqastan qaıtys boldy. Shynymdy aıtsam, ózim áli kúnge deıin kompútermen jumys isteýdi bilmeımin. Men salyq tóleıtin kezde 130.00 formasyn, 100.00, 101.04 formalaryn tapsyrý kerektiginen habarsyz boldym. Sondyqtan salyq tóleýde qatelikter jibergenimdi moıyndaımyn. Bul jerde jasyratyn eshteńe de joq»,- dep túsindirdi S. Mataev. Onyń aıtýynsha, «Ulttyq baspasóz klýby» qoǵamdyq birlestiginiń vıse-prezıdenti qyzmetin atqarǵan A. Qımasov esep-qısappen qosa, tenderlik qujattardy daıyndaýmen aınalysqan. Sóıte tura «Ulttyq baspasóz klýby» qoǵamdyq birlestiginiń shtatynda jalǵyz ǵana Seıitqazy Mataev tirkelipti. «Ulttyq baspasóz klýby» qoǵamdyq birlestiginiń shtatynda jalǵyz ózim ǵana boldym. Al «QazTAG» halyqaralyq aqparat agenttigi» JSHS-niń shtatynda 50-ge jýyq qyzmetkerler jumys istedi. Solardyń jalaqysyn agenttik ózi taýyp berdi, memleketten aqsha alǵan joq»,- dedi S. Mataev sottaǵy sózinde.
Almaty qalalyq memlekettik kirister departamentiniń salyq tólemderi boıynsha tekserýinen anyqtalǵandaı, Seıitqazy Mataev zańdy tulǵa retinde búdjetke 168 730 897 myń teńge korporatıvtik tabys salyǵyn tóleýden jaltarǵan. Sonymen qatar, jeke tabys salyǵy boıynsha 2011-2015 jyldary 65 420 741 teńge, rezıdent bolyp tabylmaıtyn tulǵalar úshin 2011- 2014 jyldary 8 578 748 teńge tólenbegen. Atap aıtarlyǵy, «Ulttyq baspasóz klýby» qoǵamdyq birlestiginiń ishki úderisinde iri kólemdegi aqsha aınalymyna baılanysty S. Mataev 100.00 (onda zańdy tulǵalardyń korporatıvtik tabys salyǵy boıynsha tabysy kórsetiledi), 101.04 (bul rezıdent bolyp tabylmaıtyn zańdy tulǵalar úshin tapsyrylady) jáne 200.00 (onda azamattyq tulǵalardyń tabysyn kórsetedi) nómirli salyq tóleý formalaryn tapsyrýǵa mindetti bolǵan. Alaıda ol tabysyn jasyryp, tek 130.00 salyq tóleý formasyn tapsyryp kelgen. Onda komersıalyq emes uıymnyń tabysy kórsetiletindikten salyq tólenbeıdi.
Sotqa deıingi tergeý is-sharalarynan anyqtalǵandaı, «2010-2015 jyldar aralyǵynda Seıitqazy Mataev óz uly – «QazTAG HAA» JSHS-iniń bas dırektory Áset Mataevpen birlesip, aldyn-ala bir top adamdarmen sóz baılasyp, aldaý men senimdi teris maqsatqa paıdalaný jolymen memlekettik satyp alý salasyndaǵy 169 mln. teńge búdjet qarajatyn jymqyrdy» dep aıyptalýda. Biraq ol mundaı aıyptaýlarmen kelisken joq. «Men eshqandaı aqsha urlaǵan joqpyn. Eger kóp aqsha urlasam, oǵan páterler men avtokólikter satyp almaımyn ba? «Ulttyq baspasóz klýby» qoǵamdyq birlestiginiń qaramaǵynda birde-bir kólik joq. Biz jumys isteıtin jerge jaqyn turatyndyqtan avtobýspen nemese jaıaý qatynadyq. Tipti bankke de jaıaý baratynbyz»,- dep túsindirdi S. Mataev. Sottaǵy sózinde ol óziniń de, týystarynyń da qarajaty joqtyǵyn aıtty. «Bárin tekserdi. Tipti meniń endi táı-táılap júrgen nemerelerimdi de tekserdi. Sol tekserilgen 64 adamnyń ishindegi úsheýi ǵana týystarym: kelinim, ózim jáne ulym»,- dedi «Ulttyq baspasóz klýby» QB-niń prezıdenti.
Ámirlan Álimjan
