Qazaqstan Respýblıkasy Din isteri jáne azamattyq qoǵam mınıstrligi Din isteri komıteti birqatar BAQ betterinde elimizdegi meshitterde resmı ýaǵyzdardan keıin qosymsha túrde onyń orys tilinde túsiniktemesi aıtylýy qajet degen másele tóńireginde týyndaǵan talqylaýlarǵa qatysty túsindirme berdi, - dep habarlaıdy Qamshy.kz.

«Qazaqstan Respýblıkasy Parlamenti Májilisinde ótken ekstremızm men terorızmniń aldyn alý máselelerine arnalǵan dóńgelek ústelde jekelegen meshitterde ýaǵyzdardan keıin ımamdardyń orys tilin paıdalanýy týraly másele Mınıstrlik tarapynan emes, osy sharaǵa qatysýshylardyń birimen kóterilgen bolatyn. Sáıkesinshe, QR Din isteri jáne azamattyq qoǵam mınıstri atalǵan is-shara barysynda osy másele tóńireginde jýrnalıser tarapynan suraqtar qoıylǵannan soń birshama túsinikteme bergen bolatyn» delingen Din jáne azamattyq qoǵam isteri jónindegi mınıstrliktiń din isteri komıteti taratqan habarlamada.

Komıtet mamandarynyń aıtýynsha, mundaı bastama qazaq tilin aıtarlyqtaı meńgermegen azamattarǵa baǵyttalǵan.

«Mınıstrlikke ıslamǵa qyzyǵýshylyq tanytyp júrgen birqatar dindarlardyń meshit ımamdarynyń ýaǵyzdaryn tolyq túsinbeıtini týraly el azamattarynan ótinishter túsip otyrady. Ótinishterde sondaı dindarlardyń osy sebepti ıslam týraly aqparatty Qazaqstan musylmandary dinı basqarmasynyń resmı kózderinen tys jerlerden, onyń ishinde teris dinı aǵymdardyń ustanýshylarynan alýǵa májbúrlik tanytatyny týraly aıtylady. Sáıkesinshe, ótinish jasaýshy azamattar halyqaralyq tájirıbeni eskere otyryp meshit ımamdary resmı ýaǵyzdardan keıin qazaq tilin aıtarlyqtaı meńgermegen azamattar úshin orys tilinde túsindirme berýdi usynady.

Osy rette, atalǵan másele turǵyndarynyń quramy kóptegen ulttardan turatyn eldimekenderdegi jekelegen meshitterge ǵana qatysty ekendigin aıta ketýimiz kerek», - deıdi komıtettiń baspasóz qyzmetinen.

Habarlamada sondaı-aq, mınıstrlik, óz kezeginde, azamattardan túsip otyrǵan kez-kelgen ótinishterdi qarastyrýǵa jáne olardy taldap otyrýǵa mindetti ekeni, mınıstrlik quziretine Qazaqstan musylmandary dinı basqarmasynyń ishki máseleleriniń sheshimin tabý kirmeıtini aıtylǵan.

Sondyqtan joǵaryda atalǵan másele boıynsha meshitterge kelýshilerdiń pikirlerin eskere otyryp sheshim qabyldaýy tıis Qazaqstan musylmandary dinı basqarmasyna habarlasý kerek eken.

Odan bólek, QR Din isteri jáne azamattyq qoǵam mınıstrligi Din isteri komıteti elimizdiń Konstıtýsıasynda kepildik berilgen sóz bostandyǵyna qurmetpen qaraı otyryp, otandyq buqaralyq aqparat quraldaryn din tárizdi ótkir salada týyndap otyratyn máseleler týraly ekiudaı aqparat berýge jol bermeýge jáne turǵyndarǵa shynaıy aqparatty durys jetkizýge shaqyrady.