Qazaqstan Prezıdenti Nursultan Nazarbaev Samarqandta Ózbekstannyń tuńǵysh Prezıdenti Islam Karımov jerlengen orynǵa gúl shoqtaryn qoıdy. Bul týraly Aqordanyń baspasóz qyzmeti habarlady.

Memleket basshysy jınalǵandarǵa arnaǵan sózinde Islam Karımovpen ekeýin uzaq jyldar boıy berik dostyq, shynaıy túsinistik, ózara tileýlestik baılanystyryp kelgenin aıtty.

– Ózbekstandyqtardyń keler urpaǵy, memleket qyzmetindegi basshylardyń kelesi býyny Islam Karımovty árdaıym este saqtaıdy dep senemin. Onyń artta qalǵan mol murasyn, memlekettik qyzmetiniń nátıjelerin urpaq zerttep-zerdelep, atqarǵan isterin ózbek halqynyń tarıhyna altyn áriptermen jazady. Ol búkil álemge tanymal kóshbasshy boldy, el ekonomıkasynyń qalyptasýy men damýy, halyqtyń ál-aýqatynyń artýy onyń esimimen baılanysty. Biz uly adamnan aıyryldyq, – dedi Qazaqstan Prezıdenti.

Sondaı-aq, Nursultan Nazarbaev baýyrlas elderimiz arasyndaǵy tarıhı jáne strategıalyq baılanysty nyǵaıtý jolynda Ózbekstannyń tuńǵysh Prezıdenti baǵa jetpes ról atqarǵanyna toqtaldy.

– Qazaq pen ózbek halqy árdaıym bir-birimen etene jaqyn boldy. Islam Abdýganıevıch ekeýmiz 1998 jyly Qoja Ahmet Iasaýı kesenesi basynda máńgilik dostyq týraly kelisimge qol qoıdyq, bizdiń qarym-qatynasymyz únemi sol kelisimge negizdeldi. Qazaqstan árqashan ózbek halqymen qanattasyp, qatar keledi jáne solaı bola beredi. Biz sizdermen barlyq qýanyshty birge bólisip, qıyn kezderde birge qaıǵyramyz, – dedi Memleket basshysy.

Sondaı-aq, Nursultan Nazarbaev I.Karımovtiń otbasymen kezdesip, Qazaqstan halqynyń jáne jeke óziniń atynan shyn nıetimen kóńil aıtty.

* * *

Qazaqstan Respýblıkasynyń Prezıdenti Nursultan Nazarbaev Ózbekstan Respýblıkasy Prezıdentiniń mindetin ýaqytsha atqarýshy Shavkat Mırzıaevpen kezdesti.

Kezdesý barysynda Elbasy taǵy da Islam Karımovtiń ózbek memleketin, elderimizdiń arasyndaǵy ózara qarym-qatynasty damytýǵa qosqan biregeı úlesin atap ótti. 

– Tarıhymyz, dinimiz, mádenıetimiz bir bolǵandyqtan, onyń búkil qaıratkerligi bizdiń halyqtarymyz arasyndaǵy dostyqty nyǵaıta túsýge qyzmet etti. Osy qundylyqtardy saqtaı bilý óte mańyzdy. Ekijaqty kezdesýler barysynda da, halyqaralyq uıymdar jumysy aıasynda da biz kez kelgen máselege qatysty ózara tıimdi sheshim taba bildik. Baýyrlastyq baılanysymyzdy budan ári de nyǵaıta berý kerek, – dedi Memleket basshysy.

Sonymen qatar, Nursultan Nazarbaev pen Shavkat Mırzıaev ekijaqty qarym-qatynastyń meılinshe ózekti máseleleri, óńirlik jáne halyqaralyq kún tártibindegi negizgi taqyryptar jóninde pikir almasty.