Qazaqstan Prezıdenti Nursultan Nazarbaev qazaqstandyq jýrnalısermen ótken brıfıńte Qytaıǵa sapar barysynda QHR Tóraǵasy Sı Szınpınmen bolǵan ekijaqty kelissózder qorytyndysyna joǵary baǵa berdi.
«Meniń Qytaı Halyq Respýblıkasyna jumys saparym óte joǵary deńgeıde ótti, ásirese biz aıtqan ekijaqty qarym-qatynas máseleleriniń barlyǵyna qytaılyq taraptyń yqylasy erekshe boldy. Birde-bir másele sheshýsiz qalmady. Biz buryn kelise almaı júrgen Qazaqstan aýmaǵyndaǵy zamanaýı kásiporyndar qurylysy jaıly naqty kelisim jasadyq. Bul tizim 51 nysandy qamtıdy, onyń ekeýi salyndy, tórteýi bıyl 2,5 mıllıard dollar qarajatqa salynady jáne 5 jyl boıy quny 26 mıllıard dollar bolatyn kásiporyndar salynady» dedi ol.
Memleket basshysy QR men QHR arasynda memleket jáne kompanıalar deńgeıindegi ortaq qorlardyń jumys isteıtinin atap ótti.
«Jibek joly qory jumys isteıdi, bul jumysty qoldaý úshin bank quryldy jáne árıne, eń bastysy – eki el arasyndaǵy kóliktik-kommýnıkasıalyq baılanys. Jyl saıyn Tynyq muhıttan Qytaı arqyly Eýropaǵa, Reseıge, Ortalyq Azıaǵa Qazaqstan arqyly júk tranzıti ulǵaıdy, Aqtaý portyn paıdalaný da birneshe esege kóbeıdi, mundaı dınamıka buryn bolmaǵan» dedi N.Nazarbaev.
«Munyń bári «Qorǵas» qurǵaq porty qurylysynyń, «Qorǵas-Almaty» úsh júz shaqyrymdyq temirjol qurylysy aıaqtalýynyń arqasynda, Qytaı shekarasynan Kaspııge deıin jetetin temirjoldyń, «Batys Qytaı – Batys Eýropa» avtokólik jolynyń arqasynda júzege asty» dedi Memleket basshysy.
Prezıdent Qashaǵan iri ken orny paıdalanýǵa berilgen soń Qytaıǵa energıa resýrstaryn jetkizý múmkindikteriniń kóbeıetinin atap ótti.
«Qazir biz shamamen 7 mıllıon tonna jetkizýdemiz, ony 20 mıllıon tonnaǵa deıin kóterýge bolady jáne Qazaqstannan Qytaıǵa gaz jetkizýdi de ulǵaıtýǵa múmkindik bar» dep, Elbasy energetıka salasyna aıryqsha mán berdi.
Ekijaqty yntymaqtastyqtyń eń mańyzdy aspektisi retinde N.Nazarbaev aýyl sharýashylyǵyn atady.
«Aýyl sharýashylyǵynda, bárinen buryn, alǵash ret Qytaıǵa bıdaı, basqa da dándi daqyldar, burshaq, et, qus ónimderin jetkizý týraly kelisimge qol jetkizdik. Endi aýyl sharýashylyǵy ónimderin óndirýshilerge jol ashamyz» dedi ol.
Onyń aıtýynsha, Qazaqstan kıberqaýipsizdikti qamtamasyz etý boıynsha Qytaı tájirıbesin úlgi etýi tıis.
