Uly maqsatymyzǵa qol jetkizýimizge eshnárse kedergi bola almaıdy!
Memleket basshysy Nursultan Nazarbaev altynshy saılanǵan Qazaqstan Respýblıkasy Parlamentiniń ekinshi sesıasyn ashty. Elbasy Parlamenttiń aldaǵy jumysyna senim bildirdi jáne zań sapasyna qatysty alda turǵan birqatar maqsat-mindetterdi aıqyndap berdi.
«Bıylǵy sesıa qasterli Táýelsizdigimizdiń 25 jyldyǵyn toılaıtyn kezeńge saı kelip otyr. Qazir álemde asa kúrdeli kezeńderdiń birin bastan keship otyrmyz. Shekara talǵamaıtyn terorızm men ekstremızm dúnıeniń barlyq qyryn sharlap keledi. Munyń bári jahandyq álemniń ajyramas bóligi Qazaqstanǵa da yqpalyn tıgizbeı qoımaıdy. Soǵan qaramastan, biz zamannyń syndarly barlyq qaterine jaýap berý úshin zor qyzmetter atqaryp kele jatyrmyz. Elimiz táýelsizdik tarıhynyń ekinshi shıregin tyń qarqynmen bastaıdy dep senemin» dedi N.Nazarbaev.
«Parlament – bul halyqtyq ókildiktiń organy. Sondyqtan da Parlamenttiń qyzmeti qoǵam úshin barynsha ashyq bolýy kerek. Zańdy qabyldaýdyń qajettiligi men barlyq logıkasy qazaqstandyqtarǵa túsinikti bolýy mańyzdy. Adamdarǵa túsindirý sharalaryn kóbirek júrgizý kerek».
«Qazaqstan Táýelsizdiktiń 25 jyldyq mereıtoıyn qarsy alýǵa daıyndalyp jatyr. Bul jyldyń basty oqıǵasy, bul toı toılaıtyn ǵana kezeń emes, halyqqa eldiń jetistikterin tolyq túsindiretin kezeń. Shırek ǵasyr ishinde júz jylǵa tatıtyn qyrýar sharalar atqaryldy. Meniń oıymsha, halyqqa aıtarymyz da az emes. Osy mereıtoıǵa arnalǵan sharalar qazirden bastalýy tıis. Al, ol mereıtoıdyń ózi qorytyndy jasaıtyn shaq bolýy kerek. Árbir qazaqstandyq, árbir aýyl turǵyny eldegi ıgilikti sezinip, bolashaq baǵdardy túsinýi kerek».
«Halyqaralyq qatynastar júıesi jetekshi derjavalar arasyndaǵy teketirestiń ósýi saldarynan boljap bolmaıtyn shekke jetti. Ekonomıkalyq sanksıalar, ymyraǵa kelmeý, ózara qaterler, qaıtadan qarýlaný jarysyn bastaýǵa nıet álemge de túbegeıli kómektespeıdi, elge de turaqtylyq ákelmeıdi. Bul álemdik qoǵamdastyqtyń halyqaralyq terorızmmen, ekstremızmmen kúresin qıyndatady jáne muny, uly derjavalar arasyndaǵy kelispeýshilikterdi ekstremıster paıdalanady».
«Ótken jazda oryn alǵan oqıǵalar álemdegi birde-bir memlekettiń, birde-bir eldiń terrorıstik aktiden aman qalmaıtynyn kórsetti. Terrorıstik qaýip Qazaqstan úshin ózekti máselege aınaldy. Búginde halyqaralyq kún tártibinde jahandyq soǵystyń aldyn alý, adamzattyń ıadrolyq ózin-ózi joıyp jiberý qaýpi ózekti máselege aınalyp otyr» dedi Elbasy.
Sonymen qatar QR Prezıdenti Táýelsizdigimizdiń ekinshi shıregi óte kúrdeli kezeńde bastalǵaly otyrǵandyǵyn eskertip ótti. «Degenmen, bul qalaı bolǵanda da bizdiń osy ǵasyrdyń ortasynda Qazaqstandy Eýrazıanyń eń damyǵan memleketine aınaldyrý, ıaǵnı álemniń damyǵan memleketteri klýbyna kirgizý syndy uly maqsatymyzǵa qol jetkizýimizge kedergi bolmaýy tıis».
