Qazaqstanda ekonomıkalyq daǵdarys jaǵdaıynda jer qoınaýyn paıdalanýshylar úshin salyqtyq jeńildikterdi engizý josparlanyp otyr. Bul týraly QR UEM mınıstri Qýandyq Bıshimbaev Salyq salýdyń ózekti máselelerine arnalǵan konferensıa barysynda málimdedi, dep habarlaıdy Baq.kz tilshisi.
«Búgingi tańda munaı óndirý salasynda ekonomıka ózgeriske ushyrady jáne biz ózgergen jaǵdaıda jer qoınaýyn paıdalanýshylar úshin salyq rejımi qandaı ekenin túsinemiz. Munaı baǵasynyń uzaq merzimdi deńgeıi qandaı bolatyny belgisiz, biraq aldaǵy 5-7 jylda olar burynǵydaı bolmaıtyny anyq. Biz jańa keńistikke enemiz, jer qoınaýyn paıdalaný salasy men óndirý salasynan Ulttyq qorǵa túsetin túsimder, salyqtar men boljamdar tolyǵymen ózgerdi», - dedi jer qoınaýyn paıdalanýshylarǵa jeńildikterdi túsindirgen Q.Bıshimbaev.
Mınıstrdiń aıtýynsha, bul jaǵdaı kásiporynǵa quıylatyn ınvestısıanyń jetispeýshiligine ákeledi.
«Qazaqstannyń óz erekshelikteri bar. Jer qoınaýyn paıdalaný kórsetkishi boıynsha damyp jáne quldyrap jatqan ken oryndary bar. Óndirýdi qajetti deńgeıde ustap turý úshin ınvestısıalar qajet. Qazirgi salyq pen baǵa deıgeıi buǵan jol bermeıdi. Biz óndirisi tómendep kele jatqan kásiporyndarǵa qoldaý, ıaǵnı olarǵa qazirgi tabystaryn joǵaltpaı, qosymsha resýrstar berýdi usynǵymyz keledi», - dedi vedomstvo basshysy.
Mınıstr erteń jer qoınaýyn paıdalanýshylarmen jumys tobynyń jıynyn ótkizetinin jetkizdi. Sondaı-aq, ol qazaqstandyq shıkizatqa suranystyń tómendegenin aıtty.
«Shıkizatqa suranys azaıyp keledi, sebebi balamaly qýat kózderi paıda bolyp jatyr. Aldaǵy 30-40 jylda biz qolda bar resýrstardy aınalymǵa, óndiris pen eksportqa maksımaldy túrde engizýimiz kerek. Bul úshin ádis-tásilderdi ózgertýimiz kerek», - dedi Q.Bıshimbaev.
Onyń aıtýynsha, jańa ken oryndaryna jańa ınvestısıalar tartý úshin tabystarǵa salyq salýdan arylyp, qarjylyq nátıjege salyq salýǵa kóshý kerek.
«Búgingi tańda biz bastapqyda tabystarǵa salyq salamyz, al qarjylyq tabysqa kóp mán bermeımiz. Osy salada jumys júıeli túrde barlyq múddeli memlekettik organdarmen birge júzege asady. Biz ekonomıka tómendegen kezeńde ınvestısıalardy tartyp, aınalymǵa engizbekpiz. Bul aldaǵy 5-7 jylda ósimge qol jetkizip, jumyspen qamtý deńgeıin kóterip, salyq salynatyn bazany arttyrýǵa múmkindik beredi», - dep qorytyndylady mınıstr.
