Qazirgi ýaqytta ekonomıkalyq básekelestikke qabylettilik álem elderi arasyndaǵy erekshe tartysqa aınaldy. Sonyń saldarynan ekonomıkalyq qaýipsizdik máselesi eń ózekti jaǵdaılardyń birine aınaldy. Qazirgi dúnıejúzilik saýda salasyn sharpyǵan qaýip Qazaqstandy da aınalyp ótpesi anyq. Búgin Astanadaǵy «Medıatehnologıalar ortalyǵy» Jeke qorynyń «SarapTime» Sarapshylyq pikirtalas klýby ótkizgen «Qazaqstandaǵy ekonomıkalyq qaýipsizdik: zańsyz saýdadan adal kásipke?» taqyrybyndaǵy kezekti otyrysyn elimizdegi ekonomıkalyq qaýipsizdik máselesi tóńireginde sóz qozǵady, dep jazady BAQ.kz tilshisi.
Jıynda Qazaqstandaǵy ekonomıkalyq qaýipsizdik aıasyndaǵy zamanaýı tendensıalardy, shekara boıyndaǵy terıtorıalardan taýarlardy jetkizý aıasyndaǵy shaǵyn jáne orta bıznes múddelerin qorǵaýdy, sonymen qatar keden tarıfi men mólsherlemeleriniń ádisteme máseleleri talqylandy.
QR Parlamenti Májilisiniń depaýttary, QR QM Memlekettik tabystar Komıtetiniń, eksperttik birlestikterdiń, ǵylymı-zertteý ınstıtýttarynyń, qoǵamdyq birlestikter men shaǵyn jáne orta bıznes ókilderi, qoǵam qaıratkerleri men buqaralyq aqparat quraldary ókilderi qatysqan jıynda qazirgi kezdegi elimizdegi ekonomıkalyq qaýipsizdiktiń aldyn alý sharalary sóz boldy.
"Qazir elimizde ekonomıka damydy. Biz de óz qolymyzben birdeńelerdi jasaı alatyn dárejege jettik. Biraq kórshilerimizben básekelesýge áli de qaýqarsyzbyz. Ekonomıkalyq qaýipsizdik týraly aıtqanda osyny eskerýimiz kerek. Eń áýeli ózge elden ımporttaıtyn taýarlardyń sanyn shekteý arqyly otandyq óndirýshilerimizge jaǵdaı jasaýymyz kerek. Áıtpese bizdiń elde 25-30 myń turatyn aıaqkıimdi ózge elden baryp 5-10 myń teńgege satyp ala salý barlyǵynyń qolynan keledi. Sondyqtan eń áýeli ekonomıkalyq qaýipsizdik týraly sóz bolǵanda, biz óz elimizdegi, otandyq taýar óndirýshilerimizdi qorǵaýdy kózdeýimiz kerek" - deıdi Qazaqstan Respýblıkasynyń Qarjy Mınıstrligi memlekettik tabystar Komıtetiniń tóraǵasy Dáýlet Erǵojın.
Búgingi otyrystyń ótýine birden bir sebep bolǵan ol - Qyrǵyz Respýblıkasy terıtorıasynan taýarlardy ótkizýdi baqylaý, kedendik tazartý kezinde Táýekeldi Basqarý Júıesi standarttaryndaǵy ádistemeler men normalardy anyqtaý aıasyndaǵy máselelerdiń qoǵamda keńinen talqylaný máselesi týyndaǵandyǵy.
"Qazirgi kezde "Qorǵas" keden beketinde Salyq komıteti tekserý júrgizip jatyr. Soǵan baılanysty ımport kólemi azaıyp ketti. Alaıda bunyń qazirgi kezdegi halyqaralyq saıası júıege esh qatysy joq. Al ekonomıkalyq qaýipsizdikke keler bolsaq ol elimizge keletin taýarlarǵa qatysty. Arzan baǵamen, sapasyz taýardyń elimizge kóptep kelýi otandyq óndirýshilerdi de, tutynýshylardy da shyǵynǵa ushyratady" - deıdi «Strategıalyq bastamalar ortalyǵynyń» bas seriktesi Oljas Qudaıbergenov.
Pikirtalas qorytyndysynda otandyq bıznestiń sátti damýy týrasynda sarapshylardyń usynystary qabyldandy.
