Kókshetaýda «Táýelsizdikke 25 jyl. Táýelsiz Qazaqstannyń damýyndaǵy máslıhattar men qoǵamdyq keńesterdiń róli» atty oblystyq forým ótti. Sharaǵa 350-den asa adam jınaldy, dep habarlaıdy BNews.kz.

Aqmola oblysynyń depýtattyq korpýsynda 276 depýtat bar. Olardyń 25%-y – áıelder.
Jergilikti ýákiletti organdar halyqtyń ómir súrý sapasyn jaqsartý maqsatynda qajetti jospar qurýdy kózdep otyr.
Aldymen, aýdan ómirine qatysty eń ózekti máseleler talqylandy, keıin máslıhat pen turaqty komısıanyń jumys jospary jáne saılaýshylardy qabyldaý kestesi quryldy.
«Elbasynyń Halyqqa joldaýyndaǵy qoıǵan tapsyrmalardy oryndaýymyz qajet. Prezıdent daǵdarysqa qarsy úsh negizgi strategıany atady. Olar: ekonomıkany ósirý, ekonomıka, qoǵam jáne memleket turaqtylyǵyn qamtamasyz etý úshin reforma jasaý; qoǵamnyń barlyq salasynda úzdiksiz jańǵyrýdy damytý», - deıdi forým tóraǵasy, Aqmola oblysy máslıhatynyń hatshysy Dýlat Nurmoldın.+
Máslıhat keńesshisi saılaý kezinde, ekonomıkalyq, áleýmettik baǵdarlamalar men jergilikti búdjetti bekitý kezinde máslıhattyń róli týraly da aıtty.
Bıyl quqyq qorǵaý salasynda jergilikti ýákiletti organdardyń quzireti keńeıgen: jergilikti polısıa qyzmetkerleri máslıhat depýtattarynyń kelisimimen taǵaıyndalady, sondaı-aq olarǵa jylyna eki ret esep beredi.
«1 qyrúıektegi kórsetkish boıynsha, oblys elimiz boıynsha aýyl sharýashylyǵynyń jalpy óniminiń kólemi jaǵynan kósh basynda tur», - dep ákimdik pen máslıhattyń birlese jumys isteýiniń jemisi retinde mysal keltirdi Nurmoldın.
Búginde Aqmola oblysynyń qoǵamdyq keńes quramynda 266 adam bar. Nurmoldın bul uıymdar jaqynda qurylǵanymen, jetkilikti deńgeıde jumys atqaryp jatqandyǵyn aıtty.
Qoǵamdyq keńes pen máslıhat depýtattarynyń arqasynda, Aqmola oblysy óndiristik ónerkásipte de, qurylys pen jol jóndeýde de, bilim men densaýlyqty saqtaýda da úlken jetistikke jetti.