Qostanaı oblysyna sapary barysynda Nursultan Nazarbaev óńir jurtshylyǵynyń tanymal ókilderimen kezdesti, - dep habarlaıdy Qamshy.kz Aqorda saıtyna silteme jasap.

Basqosýǵa óz isiniń kásipqoı mamanyna aınalǵan ártúrli qyzmettegi azamattar, eńbek sińirgen ardagerler, jastar lıderleri, úkimettik emes uıymdar men etnomádenı birlestikterdiń jetekshileri qatysty.

Memleket basshysy jınalǵan qaýymdy Táýelsizdiktiń 25 jyldyǵymen quttyqtap, respýblıkanyń eleýli jetistikterin atap ótti.

– Bizdiń barlyq jetistigimiz myqty irgetasqa – el ishindegi beıbitshilik pen turaqtylyqqa negizdelgen. Ulttyq birlik pen kelisim – Táýelsizdigimizdiń basty jetistigi. Saıasatta, ekonomıkada, qoǵamda, mádenıette túbegeıli ózgerister boldy. Memleketimizdiń halyqaralyq bedeli aıtarlyqtaı artty. Atap aıtqanda, syndarly syrtqy saıasatymyz jáne álemdik antıadrolyq qozǵalystaǵy barsha jurt moıyndaǵan kóshbasshylyǵymyz Qazaqstannyń BUU Qaýipsizdik Keńesiniń turaqty emes músheligine qabyldanýyna septigin tıgizdi, – dedi Nursultan Nazarbaev.

Qazaqstan Prezıdenti elimiz shırek ǵasyrda álem jurtshylyǵyna tanylyp, áleýmettik-ekonomıkalyq jáne mádenı áleýetimizdiń artýyna septigin tıgizgen aýqymdy nátıjelerge qol jetkizgenine toqtaldy.   

– Keler jyly Qazaqstan «ESKPO-2017» halyqaralyq mamandandyrylǵan kórmesin TMD aýmaǵynda birinshi bolyp ótkizgeli otyr. Bul is-sharaǵa 100-den astam el jáne kóptegen halyqaralyq uıymdar qatysady. Qazaqstannyń árbir óńiri osy tarıhı oqıǵany tabysty ótkizýge qomaqty úlesin qosýy kerek, – dedi Memleket basshysy.

Áńgime barysynda Nursultan Nazarbaev Qostanaı jeri Qazaqstannyń negizgi astyqty aımaǵynyń biri ekenin aıryqsha atap aıtty.  

– Damyǵan taý-ken jáne mashına jasaý sektorlary bar iri agrarlyq-ónerkásip kesheni osy óńir úshin ǵana emes, búkil respýblıka úshin de myqty ekonomıkalyq baza bolyp sanalady. Qostanaı – aýyl sharýashylyǵy damyǵan basty óńirlerdiń biri, bul óńir elimizdiń azyq-túlik qaýipsizdigine qomaqty úles qosýda. Oblystaǵy aýyl sharýashylyǵynyń jalpy ónimi 25 jyl ishinde 295 mıllıard teńgege deıin ósti, – dedi Memleket basshysy.  

Qazaqstan Prezıdenti sondaı-aq óńirdiń resýrstyq áleýetine jáne damyǵan ónerkásibine nazar aýdardy.

– Munda asbes qorynyń 100%-y, respýblıkadaǵy alúmını shıkizatynyń  98%-dan astamy jáne temir rýdasynyń 93%-y shoǵyrlanǵan. Indýstrıalandyrý jyldarynda oblysta 121 mıllıard teńge ınvestısıa tartylǵan 82 joba iske qosyldy. Osyǵan oraı 5 myńǵa jýyq jańa jumys orny ashyldy. Indýstrıalandyrý avtomobıl qurylysy men metalýrgıa sıaqty óńdeý ónerkásibiniń jańa sektorlaryn qalyptastyrýǵa múmkindik týdyrdy. 2010 jyldan beri 29 myńǵa jýyq jeńil avtokólik qurastyryldy, – dedi Nursultan Nazarbaev.

Buǵan qosa, Memleket basshysy óńirdiń kólik jáne áleýmettik ınfraqurylymyn keshendi damytýdyń mańyzdylyǵyn atap ótti. 

– Oblys turǵyndary úshin «Altynsarın – Hromtaý» jáne «Arqalyq – Shubarkól» baǵytyndaǵy jańa temirjoldar qurylysy mańyzdy oqıǵa boldy. Bul áleýmettik-ekonomıkalyq damýǵa tyń serpin berdi. 25 jyl ishinde óńirde 5 mıllıon sharshy metrge jýyq turǵyn úı paıdalanýǵa berildi, – dep atap ótti Qazaqstan Prezıdenti.

Qostanaılyqtar Nursultan Nazarbaevqa óńirge udaıy kórsetip otyrǵan qamqorlyǵy jáne tıimdi memlekettik saıasaty úshin alǵys bildirdi. 

Sondaı-aq kezdesý barysynda Qostanaı oblysynyń ákimi A.Muhambetov oblystaǵy áleýmettik-ekonomıkalyq jaǵdaı jáne ony damytý perspektıvalary týraly baıandady.

Sońynda Memleket basshysy jınalǵan qaýymdy Qazaqstan Táýelsizdiginiń 25 jyldyǵymen quttyqtap, olarǵa bereke-birlik pen tabys tiledi.