Táýelsizdiktiń 25 jyldyǵyna oraı Reseı Federasıasy Sheshen-Ingýsh Respýblıkasynyń «Ingýshetıa» halyq bı ansambli Kókshetaýda óner kórsetti, dep habarlaıdy BNews.kz tilshisi.
Konsertke arnaıy kelip qatysqan Aqmola oblysy ákiminiń orynbasary Nurlan Nurkenov ujym dırektory Magomet-Bashır Dosqoevqa alǵysyn bildirip, oblys ákimi Sergeı Kýlagınniń Ingýshetıanyń Mádenıet mınıstri Maret Gazdıevaǵa joldaǵan quttyqtaý hatyn oqyp berdi. Taraptar ózara syılyq almasty.
«Biz Kókshetaýǵa kelmes buryn, Pavlodar, Qaraǵandy, Astana jáne Shýchınsk qalalarynda óner kórsettik. Áke-sheshem osy Kókshe óńirinde turǵan. Keıin tarıhı Otanyna qaıta oraldy. Sondyqtan men bala kúnimnen Kókshetaýdy jaqsy kórip óstim. Men úshin Qazaqstan óte ystyq. Ata-anam qazaq halqynyń jaqsylyǵyn aýzynan tastamaı aıtyp otyrady. Bul joly da olardyń ystyq sálemin ala keldim», – deıdi «Ingýshetıa» halyq bı ansambiliniń kórkemdik jetekshisi, Ingýshetıaǵa jáne Sheshenstanǵa eńbegi sińgen mádenıet qaıratkeri Rýslan Gadaborshev.
Konsertte kórermenniń erekshe kóńilinen shyqqan – kópepızodty «Kavkaz súıtasy» horeografıalyq kompozısıasy boldy. Onda Kavkaz halyqtarynyń bı óneri tolyq ortaǵa salyndy. Kostúmderindegi ózgeshelik, qaıtalanbaıtyn bı qımyldary, birin-biri tolyqtyrǵan shyǵarmashylyq baılanys jarasymdy-aq. Ingýshetıa Respýblıkasynyń Halyq ártisi Djabraıl Bogatyrevtiń aıaqtyń ushymen bıleýi áserli boldy.
Kórermen «Taýdaǵy tań», «Kavkazdaǵy karnaval», «Assa», «Bulaq basyndaǵy kezdesý» kompozısıalarynan keıin uzaq qol shapalaqtap, kópke deıin ártisterdi sahnadan jibermedi. Ingýshetıanyń Halyq ártisteri Lýıza Eljýrkaeva, Alaýdın Esmýrzıev pen halyqaralyq konkýrstardyń laýreaty Rahman Bekovtardyń oryndaýyndaǵy ánder shabyttandyryp, shattandyrdy.
«Ingýsh bı mádenıeti óziniń áralýandyǵymen erekshelenedi. Onyń tamyry tym tereńde jatyr. Bul bılerde taý halyqtarynyń bolmysy, onyń ǵasyrlar boıy jasaǵan bar ıgi shyǵarmashylyq muralary kórinis beredi. Qyzdardyń yrǵaqty da sándi qımyldary men jigitterdiń ıkemdilik, kúsh pen jigerge negizdelgen ushqyr qozǵalystary osynyń birden-bir aıǵaǵyndaı. Atalǵan ujymnyń maqsaty – tereń mazmundy kórkem bı týyndylaryna ómir syılap, jastar men jetkinshekterdi sol rýhta tárbıeleý», – deıdi Aqmola oblystyq sheshen-ıngýsh ulttyq ortalyǵynyń jetekshisi Gerıhan Iandıev.
