Almaty oblysy Jambyl aýdanynda bolǵan qaıǵyly oqıǵa janyna batpaǵan qazaq joq shyǵar. El aman, jurt tynyshta, adal eńbegimen otbasyn baǵyp júrgen úsh birdeı azamattyń qandyqol qylmyskerlerdiń qolynan mert bolýy kimdi bolsa da alańdatady. Mundaı soraqylyqtyń aram oıly qaskóılerdiń ózderin jazasyz ketetinine senimdiliginen bolatyny da túsinikti. Zań qatal emes deı almaımyz. Qylmyskerler biri qalmaı jaýapqa tartylyp, qylmystyń aldyn alý sharalary durys júrgizilse, jaǵdaı basqasha bolar ma edi? Bir aptaǵa jýyq qan jutyp, qaıǵyrǵan jurttyń sońǵy úmiti úzildi. Joǵalǵan azamattardyń qazasy týraly qaıǵyly habardy sharasyz qabyldady.
Qoǵamdyq rezonans týǵyzǵan osy oqıǵaǵa qatysty san alýan pikirler, boljam, joramaldar da aıtylýda. Onyń bári orynsyz deı almaımyz. Tek oıymyz, isimiz atalǵan qylmystyń tolyq ashylýyna, ádil sheshim shyǵyp, kinálilerdiń zańǵa saı jazalanýyna yqpal etse deıik. Osy oraıda áleýmettik jelide qandy qylmysqa qatysty jazylǵan birqatar el azamattarynyń pikirlerin nazarlaryńyzǵa usynamyz.
Aýyt Muqıbek, aqyn:
Óte ókinishti jaǵdaı boldy bul! «Dúnıesi qursyn, jigitterdiń óz bastary aman bolsa eken!»-degen tilegimiz oryndalmady. Allanyń jazýyna pendeniń qylar aılasy joq! Jandary Jannatta bolsyn úsh azamattyń!
Úsh birdeı jigittiń, úsh otbasynyń arqasúıeriniń tapa-tal túste jazyqsyzdan-jazyqsyz qanysherlerdiń qolynan qaza tabýy, árıne, ońaı sharýa emes! Bárimizdiń de tisimiz shyqyrlap, judyryǵymyz túıilip otyr. Halyqtyń qobaljýy da zańdy. Degenmen, bul oqıǵadan saıası astar izdeýdiń, bólinip, jarylýdyń qajeti joq. Aqshaǵa qunyqqan qaskóıler úshin seniń kim bolýyń, qaıdan kelýiń mańyzdy emes. Olarǵa bári bir. Obal-saýap degenge qaramaıdy. Qudaı mundaı bále-qazadan kim-kimdi bolsa da saqtasyn dep tileıik!
Eń bastysy, týysqandarǵa, jerlesterge sabyrlylyq tileımin. Bolmas iske bolattan berik bolaıyq! Qudaıǵa shúkir, Qazaqstannyń quqyq qorǵaý organdary bar. Mine, qylmyskerler qolǵa tústipti. Ary qaraı bul qylmystyń beti ashylady, qanysherlerdiń jazasy beriledi...
Opat bolǵan baýyrlarymyń otbasyna kóńil aıtam! Azamattardyń Alla aldynan jarylqasyn!
Qýandyq Shamahaıuly, jýrnalıs:
Qylmysker qanisherde ult ta, uıat ta bolmaıdy. Olarǵa keregi ońaı olja. Sen oralmansyń ba, alyssyń ba, jaqynsyń ba qaramaıdy. Aqsha úshin ondaılar qasyndaǵy sybaılasyn da óltire salady. Sondyqtan onyń astarynan túrli sebep-saldar izdeýdiń qajeti joq. Qylmysker eshkimdi aıamaıdy degendi túsineıik.
Biz birlik tanytyp ádiletsizdikpen aıaýsyz kúressek qana syrqat qoǵamdy saýyqtyramyz. Azǵyndyq ataýlyny úlken-kishi demeı áshkerelep synaıyq. Jemqorlyq jaılap arsyzdyq beleń alǵan qoǵamdy jappaı jańartý, túbegeıli ózgertý úshin demokratıalyq ozyq qundylyqtardy ornyqtyrý, halyqqa adal qyzmet etýdi úkimet organdarynan qatań talap etý bárimizge paryz.
Serik Boqan, aqyn:
Bul óte astary tereń qandy oqıǵany áste jaı qaldyrýǵa bolmaıdy... Úsh kún boıy kóz aldyndaǵy oqıǵaǵa selt etpeýi kúdik týdyrady. Astarly qylmysty ashýǵa kúsh saý kerek árbir ádiletti jaqtaıtyn azamat!
