Bul  aýdanda halyq sanynyń tyǵyzdyǵyn kórsetse kerek. Halyqtyń demografıalyq ósimin kóbeıtip otyrǵan Alataý aýdanynda páter jaldap turýshylar da, bazarlar sany da kóp. Bazary kóp aımaqqa mıgranttardyń da kóptep kelýi zańdylyq. Osy oraıda aýdannyń áleýmettik jaǵdaıy, ekonomıkasy týraly bilgimiz kelgen edi. Biz bul saýalymyzdy Alataý aýdanynyń ákimi Baǵdat Mánizorovqa qoıdyq. 

– Baǵdat myrza, Alataý aýdanynyń quryl­ǵanyna segiz jyldaı ýaqyt ótipti. Alataý aýdanynda bilýimizshe, 220 myńǵa jýyq halyq turady. Halyq óte tyǵyz qonystanǵan aımaq. Ári jańa aýdandy basqarý sizge ońaı soqpaǵan bolar. Segiz jylda bul aýdanda ne ózgerdi?
– Ózderińiz de bilesizder, Almaty qalasyndaǵy Alataý aýdany 2008 jyldyń 2 shildesinde Almaty qalasy Máslıhatynyń sheshimimen  quryldy. Kólemi 10,5 myń gektar aýmaqty alyp ja­tyr. Aýdan qurylǵan segiz jyldyń ishinde mundaǵy halyq sany 1,4 esege  kóbeıip, 220 myń adamǵa ósipti. Osy segiz jyl ishinde aýdannyń damyp, kórkeıýi úshin  274,2 mlrd teńge ınvestısıa bólindi. 
Segiz jylda aýdan túrli jańa nysandar­men tolyqty.  Aýdan ákimshiligi, prokýra­týra, sot,  memlekettik kirister basqarmasy, ishki ister basqarmasy, arnaıy mamandan­dyrylǵan halyqqa qyzmet kórsetý ortaly­ǵy, qalalyq arhıv  sıaqty ǵımarattar qo­syldy.
Aýdan ashylǵan ýaqytta bilim salasy syn kótermegen edi. Onyń da sebebi bar:  óıtkeni  1000 oqýshy oqıtyn mektepterde 1,5-2 ese bala sany artyq bolǵan. Munyń da sheshimin tabýǵa tyrystyq. Aýdanda sońǵy jyldary  9 800 oryndyq toǵyz jańa mek­tep salyndy, halyqtyń ál-aýqaty kóteril­di. Sonyń nátıjesinde, bilim sapasy kó­terilip, aýyz toltyryp aıtatyndaı jetis­tikterge qol jetkizdik. Sońǵy 3 jyl qatarynan aýdanymyz Ulttyq biryńǵaı testileýden Almaty qalasynyń aýdandary arasynda jáne Respýblıka boıynsha birinshi oryndy ıemdenip keledi. Bul úlken jetistik emes pe?  Atap aıtar bolsaq, 2013-2014 oqý jylynda 97,3 balmen, 2014-2015 oqý jylynda 97,7 bal jáne byltyrǵy oqý jylynda 103,5 balmen joǵary  kórsetkish kórsettik.  Sonymen qatar «Altyn belgi» tósbelgisin ótken oqý jylynda 46 oqýshy qorǵasa, bıylǵy oqý jylynda 58 oqýshy qorǵap shyqty. 
Aýdanymyzda sondaı-aq Respýblıka­lyq daryndy balalarǵa arnalǵan sport mektep-kolledji, 320 oryndyq «Aby­laı-T» jáne 70 oryndyq  «Qaınar»  atty jekemenshik mektepter jumys isteıdi.  Aý­dan­daǵy 1 fızıka-matematıkalyq lı­seı, 1 mek­tep-lıseı, 1 mektep-gımnazıa jáne 22 jal­­py bilim beretin mektepterde 35 817 oqýshy bilim alýda.
Balalardyń bilim kórsetkishteriniń joǵary deńgeıde ekeni qýantady. Sondaı-aq aýdanymyzda 2700 oryndyq 12 memle­kettik balabaqsha ashyldy.  Aýdandaǵy 3470 oryndyq 16 memlekettik balabaqshada 3543 bala tárbıelenýde. Al 50 jekemenshik balabaqshada  2192 bala tárbıelenýde, sonyń 20 balabaqsha memlekettik-jeke­menshik áriptestik baǵdarlamasy boıynsha ashyldy. 
Ekinshiden, bir aýysymda 1400 adam qabyldaı alatyn zamanaýı talapqa saı jabdyqtalǵan 4 qalalyq emhanamyz bar.  Qazirgi tańda bir aýysymda 1600 adam qabyldaı alatyn 5 qalalyq emhana halyqqa qyzmet kórsetýde. Aýdanda halyq sanynyń kóbeıýine baılanysty, kóp fýnksıonaldy  aýrýhana qajet. Ony da bolashaqta sheshemiz degen oıdamyz. 
Sońǵy ýaqytta  51 shaqyrym jol salynyp, 20 shaqyrym jol jóndeldi. 158 983 shaqyrymǵa aryq salynyp, 3,7 shaqyrym aryq jóndeýden ótti jáne 100 shaqyrymdyq elektr jelileri salynyp, 78 shaqyrymdy  qaıta jóndeýden ótkizdik. Aýdannyń elektrlendirilýi joǵary deń­geıde. 
Eń úlken máseleniń biri – jaryq­tandyrý. Munyń da sheshimin tapqan sıaqtymyz. Qazir  331 shaqyrym kóshege jaryq júrgizildi. Gaz júrgizý máselesinde de qıyndyqtar artta qaldy. Qorshaǵan ortany lastanýdan qorǵaý maqsatynda aýdan aýmaǵynyń 95 paıyzyn gazben qamtamasyz ettik. 74 shaqyrym sý júıesi, 24 shaqyrym káriz júıesi júrgizildi. «Aqbulaq», «Alǵabas-6», «Saıaly» yqsham­aýdandary  jáne «Nurkent», «Aqkent» turǵyn úı keshenderi memlekettik baǵdarla­ma aıasynda salyndy. Qazir 268 úı paıdalanýǵa berildi. 20 aýlada balalardyń 20 oıyn jáne sporttyq alańy ashyldy. Alataý aýdanynyń tarıhı jańa paraqsha­synda  jańa nysandar boı kóterdi. Olar: 12 myń oryndyq «Almaty Arena» muz aıdyny, atletıkalyq aýyl, «Alataý» dástúrli óner teatry, mamandandyrylǵan halyqqa qyzmet kórsetý ortalyǵy. 
Momyshuly dańǵylynyń boıynan jańa meshittiń de menmundalaıtyn kúni alys emes. 
Aýdannyń ónerkásip salasy kúnnen-kúnge  damý ústinde, kásiporyndar 1,9 esege ósip, sany 3167-ge jetti. Salyq tólemderi 6,5 mlrd teńgeden 20 mlrd teńgege ósti. Ortasha jalaqy 63 myńnan 129 585 myń  teńgege kóterildi.
Osy atqarylǵan ıgilikti isterdiń bári halyqtyń memleketke, Elbasyna degen senimdiligin arttyrdy. Alataý aýdanynyń damýy únemi Elbasynyń, qala ákiminiń basty nazarynda.
– Bir kezderi bul aımaqta kópshilik bara­tyn oryndar kóp bola qoıǵan joq. Saýda núktelerin, oıyn-saýyq ortalyqtaryn ashý máselesi qalaı sheshimin tapty?
– Alataý aýdany ashylǵan ýaqytta, aýdan aýmaǵynda 18 bazar bar bolatyn. 2013 jyly qala aýmaǵyndaǵy bazarlardy qazirgi zaman talaptaryna sáıkestendirý boıynsha baǵdarlama qabyldanyp, osy baǵdarlamaǵa Soltústik aınalym kóshe­sindegi «qyzyl syzyq» ústinde ornalasqan  14 bazar kirdi.
 «Qyzyl syzyq» ústinde ornalasqan 14 bazardyń toǵyzy  tolyǵymen, bes bazar «qyzyl syzyqqa» deıin jartylaı buzyldy. Búginde jartylaı bosatylǵan 5 bazardyń ornynda tórt jańa saýda ortalyǵy salyn­dy.  Olar: «Alataý-2», «Aqbulaq», «Eýrazıa» jáne «Saıahat» bazarlary.  
Aıta ketetin taǵy bir dúnıe: tazarǵan bazarlardaǵy jumys oryndaryn saqtap qalý maqsatynda, aýdan aýmaǵynda jeke ınvestorlardyń qoldaýymen zamanaýı 4 jańa bazar ashyldy («Ójet», «Arlan», «Qazyna», «Kenjehan-2»).
Sondaı-aq Alataý aýdany jańadan damyp kele jatqan aýdan bolǵandyqtan, segiz jyldyń ishinde jeke kásipkerlerdiń nıet bildirýimen «Alataý», «Domıllıon», «Magným», «Arzan» iri saýda ortalyqtary ashylyp, qala  turǵyndarynyń ıgiligine aınalǵan.
2010 jyly «Halyq» saıabaq sport kesheni ashylǵan edi. 2010-2015 jyldar aralyǵynda 15 sport alańy, 1 stadıon jáne bıylǵy jyly 4 sport alańy iske qosyldy. 2014 jyly «Alataý» kınokonsert zaly ashylǵan, bıyldan bastap  ony «Alataý dástúrli óner teatry» dep ózgerttik. Teatr úsh úlken zaldy qamtıdy.
– Aýdanda birneshe bazar  bolǵan soń, syrttan kelýshiler de kóbeıetini zańdylyq. İshki jáne syrtqy mıgrasıany retteý ońaı emes shyǵar. Bul oraıda qandaı naqty sharalar atqarylýda?
– 2016 jyldyń 8 aıynda Almaty qalalyq mamandandyrylǵan aýdanaralyq ákimshilik sotynyń sheshimi boıynsha Almaty qalalyq İİD ýaqytsha ustaý ortalyǵyna 243 shetel azamatyn alyp keldik. Maqsat – olardyń tulǵasyn anyq­taý. Sondaı-aq QR aýmaǵynan úsh júzden astam shetel azamaty shyǵaryldy.
QR İİM «Eńbekshi kóship kelýshige ruqsatty berý, uzartý jáne keri qaıtaryp alý, sondaı-aq eńbekshi kóship kelýshilerdi tirkeý, dakto, foto esepke alýdy qa­lyptastyrý jáne júrgizý qaǵıdalaryn bekitý týraly» buıryǵyna sáıkes, eki jarym myńnan astam azamatqa QR aýmaǵynda eńbek etýge ruqsat berilgen, onyń ishinde myń úsh júzge jýyq azamattyń QR aýmaǵynda eńbek etý merzimi uzartyldy.
Alataý aýdandyq İİB-na KPB-ne ýaqytsha on myńǵa jýyq shetel azamaty tirkelgen. Aýdan aýmaǵynda, onyń ishinde bazarlarda qandaı da bir ruqsat etý qu­jattarynsyz júrgen azamattardy anyqtaý maqsatynda aýdandyq İİB-nyń KPB-men 2016 jyldyń 20-24 sáýiri aralyǵynda «Nelegal», 18-22 mamyry aralyǵynda «Mıgrant» atty reıdtik is-sharalar ótki­zildi. Sonymen birge, aı saıyn josparly reıdter júrgizilip otyrady.  Munyń bári eldiń qaýipsizdigi úshin jasalyp otyr. 
– «Baraholka» dep atalatyn bazarlar­dyń retke kelgeni qýantady. Jan-jaqtan aǵylǵan mıgranttardyń densaýlyǵyn únemi qa­daǵalap otyrý múmkin emes. Degenmen  juq­paly aýrýlardyń, onyń ishinde týberkýlez aýrýlarynyń aldyn alý úshin arnaıy tek­seris jasala ma?
– Árıne, aýdan aýmaǵynda juqpaly aýrýlardyń, onyń ishinde, týberkýlez, A gepatıti, qan aýrýlarynyń aldyn alý maqsatynda arnaıy jumystar atqarylyp otyrady. Jyl saıyn aýdandaǵy 14 bazarǵa qalalyq týberkýlezge qarsy kúres dıs­panserimen birlesip, flúro­mashına qoıy­lyp, azamattardy flúro­grafıalyq tek­se­rý­den tegin ótkizýge jaǵdaı jasaımyz. Son­daı-aq aýdanda páter jaldaýshylardyń kóp ornalasýyna baı­lanysty yq­shamaýdandardaǵy mektepterdiń aýmaǵyna jaz aılarynda flúromashına qoıylyp, aýdan turǵyndaryn da  birge ótkizemiz. 
Bıylǵy jyly «Zabota» daǵdarys or­taly­ǵymen birlesip, aýdandyǵy «Bolashaq», «Qazyna», «Alataý», «Eýrazıa» bazarlaryna medısınalyq tekseris júrgizilip, 810 mıgrant qamtyldy. Onyń ishinde, 475 aza­mat – syrtqy mıgranttar, 335 azamat – ishki mıgranttar. Syrtqy mıgranttardyń basym bóligi – Qyrǵyzstan, Tájikstan memle­ketterinen kelgender. Tekseris barysynda flúromashına qoıylyp, mıgranttarǵa flúrografıalyq tekserý júrgizilip, tegin medısınalyq keńester berildi. 
Sonymen qatar shilde aıynda «Den­saýlyq joly – 2016» aksıasynyń negizinde aýdandaǵy «Kenjehan», «Qazyna», «Bo­lashaq», «Arlan» bazarlaryna týberkýlez, qan aýrýlaryna tekseris júrgizildi. Medısınalyq tekserý barysynda 392 adam qamtylyp, aýrýdyń belgileri baıqalǵan azamattar tıisti oryndarǵa jiberildi. 
Halyq densaýlyǵy – bizdiń densaý­lyǵymyz. Sondyqtan mundaı sharalardy jıi ótkizip otyrýymyz kerek. 
– Bıyl «Shańyraq-2» yqshamaýdanynda birinshi synypta 17 synyp ashyldy. Bul – qýanarlyq jaǵdaı. Degenmen, barlyq balany bir mektepke qabyldaý qıyndaý tıetin sıaqty. Odan bólek Darhan aýylyn­daǵylar da Ójet pen Uljan yqshamaý­dan­daryndaǵy mektepterge barýǵa májbúr. Mektep salý qalanyń bas josparyna engizilgen be?
– Aýdandaǵy bilim mekemelerinde bas-aıaǵy  35 817 oqýshy bar. Bul kórsetkish byltyrǵymen salystyrǵanda,  3596 balaǵa ósti. Byltyrǵy oqý jylynda 1-synypqa 4717 bala qabyldansa, bıylǵy oqý jylynda 5 367 bala mektep tabaldyryǵyn attady.
«Shańyraq-2» yqshamaýdanynda ornalasqan №26 jalpy bilim beretin mektep  2076 balaǵa arnalǵan. Munda qazir 3066 bala bilim alýda. Bıylǵy jyly mektepte on jeti birinshi synyp ashylyp, 466 bala mektepke qabyldandy. Osyndaı jaǵdaı Ójet yqshamaýdanyndaǵy №156 mektepte (19 – 1-synyp), Uljan yqshamaý­danyndaǵy №152 mektep-gımnazıada (17 – 1-synyp), Alǵabas yqshamaýdanyndaǵy №185 mektepte (10 – 1-synyp) oryn alýda. Bala sany jyldan-jylǵa ósip keledi. Bul – úlken qýanysh.  
Uljan yqshamaýdanyndaǵy 1200 balaǵa arnalǵan №152 mektep-gımnazıada 2554 bala bilim alýda. Osy mektepke Darhan yq­shamaýdanynan 293 bala,  Baıbesik  yqshamaýdanynan 34 bala qatynap oqıdy.
Sonymen qatar Ójet yqshamaýdanyn­daǵy 1470 balaǵa arnalǵan №156 mektepte 3227 bala bilim alýda, Darhan yqsha­maýdanynan 115 bala, Baıbesik yqshamaý­danynan 535 bala qatynap oqıdy. Qazirgi tańda atalǵan mektepke 648 oqýshyǵa ar­nalǵan qosymsha ǵımarat salynýda. Atal­ǵan qurylys  2017 jyldyń  sáýir aıynda tolyq aıaqtalady dep josparlap otyrmyz.
Mektepterdegi oryn tapshylyǵy jó­nin­de Almaty qalalyq Bilim jáne Qury­lys basqarmalarynyń nazarynda tur. 
Darhan yqshamaýdanynda 2019-2020 jyldarǵa 1200 oqýshyǵa arnalǵan jańa mek­tep salý  qalanyń bas josparyna engizildi.
– Ótken jyly «Almatynyń Ala­taý aýda­ny bolashaqta qala ortalyǵyna aı­nalady. Óıtkeni bul jer keń jáne ja­zyq. Al qala ortalyǵynda jaıaý júrgin­shi­ler júretin kósheler kóptep salynatyn bo­lady. Men kezinde Qazaqstannyń jańa astanasyna laıyq oryn izdegen kezde, myna İle ózenine qaraı, jel soǵatyn jerge Almatyny kóshirý týraly oı boldy. Endi myna Alataý aýdany qazir sol baǵytta damyp jatyr. Sondyqtan bolashaqta Alataý aýdany Almatynyń ortalyǵyna aınalyp ketýi ábden yqtımal. Óıtkeni qansha aıtqanmen qala orta­lyǵyndaǵy ǵımarattar eskiredi. Al bul jerge qaladaǵy barlyq óndiris oryndary kóshi­riledi. Sáıkesinshe, aýdan budan ári qarqyndy damıtyn bolady. Jumys oryndary ashylady» degen edi Elbasy. Osy oraıda, jańadan ashylatyn óndiris oryndary týraly aıta ketseńiz.
– Qazir ǵana ózińiz aıtyp ótkendeı, Alma­ty qalasynyń Alataý aýdany – búgingi kúni qarqyndy damyp kele jatqan Elbasynyń bastamasymen ashylǵan Almatynyń jańa aýdandarynyń biri. 
Aýdan aýmaǵynda ashylǵan «Indýs­trıaldyq aýmaqty» jeke dara bólip aıtýymyzǵa bolady. 
«Indýstrıaldyq aýmaq» salýǵa 490 gektar jer bólinip, bul jerde 20 myń jańa jumys ornyn qurýǵa múmkindik beretin júzden astam kásiporyndy ornalastyrý josparda tur.
«Indýstrıaldyq aýmaqtaǵy» ınfra­qurylymdy damytýǵa búdjetten 20,3 mlrd teńge qarajat bólinip, jol, gaz jelisi,  aýyzsý jáne káriz júıesi salyndy. Qazirgi tańda «Indýstrıaldy aýmaqqa» ornalasýǵa nıet bildirgen kásiporyndar ishinen  33 joba tandalyp alyndy.
Atalǵan 33 joba iske qosylǵan jaǵdaıda, óndiris oryndarynda 4 989 jańa jumys oryndary ashylmaq. Bul degenimiz – ekonomıkanyń damýy men halyqtyń ál-aýqatynyń jaqsarýyna úlken úlesin qosady degen sóz.
Búgingi kúni «Indýstrıaldyq aýmaqta» respýblıka boıynsha eń úlken jylyjaı salyndy. Onyń jalpy aýmaǵy – 17 gektar. Jobanyń quny –7,8 mlrd teńge, óndiris qýaty – jylyna 7000 tonna, ashylatyn jumys ornynyń sany – 150.
Bul joba «Indýstrıaldyq aýmaqtaǵy» salynyp jatqan obektilerdiń alǵashqysy qana. Al jylyjaı óz ónimin osy qarasha aıynda bere bastaıdy. 
– Kópshilikti «Alǵabastaǵy» úılerdiń jaıy alańdatyp tur. Jańa salynǵan úı­lerdiń qısaıýyna ne sebep?
– «Alǵabas-6» yqshamaýdanyndaǵy 2016 jylǵy kóktem aılaryndaǵy jaýyn-sha­shynnyń kóp túsýi saldarynan jáne jer­asty sýlarynyń kóterilýine baılanysty №136, 148 turǵyn úılerdiń astyndaǵy jer qyrtysy ylǵaldanyp úıler qısaıǵan. Qazirgi tańda atalǵan úılerdiń turǵyndary basqa úılerge kóshirildi. Almaty qalasy qurylys basqarmasynyń tapsyrys berýimen arnaıy «Gıdrospesstroı» JSHS mekemesi turǵyn úılerdi qalpyna keltirý maqsatynda tıisti jumystardy júrgizýde. Jalpy, eki úıdi salǵan eki qurylys kompanıasy. Olar: №136 «Astana Qurylys» JSHS-na, №148 turǵyn úı «Danıa konstrakshn» JSHS-na tıesili.
– Shańyraqtaǵy úıler zańdastyrylyp berilgenin bilemiz. Odan bólek, alaıaqtarǵa aldanyp, zańsyz jerlerdi ıemdengen aǵaıyndar da jeterlik.  Zańsyz jerlerdi zańdastyrý máselesi qalaı júzege asýda?
– 2008 jyly Alataý aýdany ashylǵan ýaqyttan bastap 5 400 zańsyz, óz betimen basyp alynǵan jer telimderi zańdastyryl­ǵanynan kópshilik habardar. Odan bólek, magıstraldyq gaz qubyrynyń (73 úı), joǵarǵy elektr jelisiniń aýmaǵynda orna­lasqan (121 úı) zańsyz jer telimderine bir bólmelik páter men basqa jer telimderi berildi. Sý qorǵaý aýmaǵy (saıly qaýipti aýmaqta), qyzyl syzyqta (jańa jol qury­lysy ústinde) ornalasqan jer telimderine basqa yqshamaýdandardan jer telimderin usyndyq.
 Búgingi kúni jer máselesi 95 paıyzǵa sheshildi dep aıtýǵa bolady.
– Ýnıversıada ótetin ýaqyt taıap keledi. «Muzdy arena» men atletıkalyq aýyl «Ala­taý» aýdanynda boı kóterýde. Jalpy, aý­dannyń Ýnıversıadaǵa daıyndyǵy qalaı?
–  Almaty qalasy Alataý aýdanynda ornalasqan Ýnıversıada nysandarynyń qazirgi tańda qurylysy tolyǵymen aıaqtaldy. Onyń ishinde 12000 kórermenge arnalǵan «Muz arenasy», 5000 kórermenge arnalǵan atletıkalyq aýyl Almaty qalasy Alataý aýdanynyń soltústik-batys bóli­giniń  Momyshuly dańǵyly boıynda orna­lasqan. 
12 000 kórermenge arnalǵan «Muz arenasy» – kópfýnksıonaldy qury­lystyń biri. Qalanyń árbir turǵynyna biregeı qoljetimdi ártúrli qyzmet túrleri kórsetiledi. Bul zamanaýı ámbebap qurylys nysany konserttik baǵdarlamalar men halyqaralyq túrli sport túrlerinen jarystardy ótkizý úshin paıdalanylady.  
«Muz arenasy» jyl saıyn  600 myńǵa  jýyq adam qabyldaı alady. Osyǵan oraı,  Muz aıdynyna keletin qonaqtardy qa­byldaý úshin 3 qabatty keshende 5 bar, 2 býfet, 3 kafe ornalasqan. Muz saraıy muz aıdynymen ǵana emes, 7 túrli sport jat­tyǵýlaryna arnalǵan zaldar, úlkender men balalarǵa arnalǵan 2 baseın bar. Muz saraıymen kórshiles ornalasqan 5000 oryndyq atletıkalyq aýyl turǵylyqty jáne áleýmettik-kommersıalyq baǵytqa arnalǵan. Kúni keshe Almaty qalasynyń 1000 jyldyǵyna oraı, «Muz arenasynyń» ashy­lý saltanaty ótti. Merekelik sharaǵa Elbasy Nursultan Nazarbaev arnaıy keldi. 
«Almatynyń 1000 jyldyǵyn almaty­lyqtarmen birge Qazaqstan ǵana emes, búkil álemdik qaýymdastyq ta atap ótýde. Bul tarıhı data IýNESKO-nyń mereıtoılyq datalar tizbesine endi. Osy sheshimnen Almatynyń aımaqtyq, jahandyq damýdaǵy aıryqsha róli kórinip otyr. Alataý bókterindegi qasıetti meken óziniń úlken tarıhynda talaı oqıǵalarǵa kýá boldy. Bul jermen Uly Jibek joly ótti. Ol Shyǵys pen Batysty, Soltústik pen Ońtústikti, ulan-ǵaıyr Eýrazıany jalǵaǵan alǵashqy búkil adamzattyq saýda joly edi. Budan 550 jyl buryn búkil Jetisý jeri Qazaq han­dyǵynyń altyn besigi boldy. HH ǵasyrda da Almaty erekshe ról atqardy. 1929 jyly ol Qazaqstan astanasy boldy. Birtindep mıllıon turǵyny bar megapolıske aı­naldy. Almaty egemen, táýelsiz Qazaq­stannyń alǵashqy astanasy mártebesine ıe boldy. Sol sebepti de, qalanyń 1000 jyl­dyǵyn el bolyp Otanymyz táýel­sizdiginiń 25 jyldyq mereıtoıymen qatar toılap jatqanymyz sımvoldyq máni bar nárse», – dedi Elbasy.

Áńgimelesken Gúlzına BEKTAS