Aýyl sharýashylyǵy kooperatıvteriniń mindetti túrde jer teliminiń bolýy shartyn alyp tastaý kerek. Bul týraly búgin ótken Úkimettiń selektorlyq otyrysynda ulttyq ekonomıka mınıstri Qýandyq Bıshimbaev málimdedi, - dep habarlaıdy Qamshy.kz.

Aıta keteıik, Úkimet músheleriniń qaraýyna salyq saıasatyn jáne salyqtyq-kedendik ákimshilendirýdi jetildirý jónindegi zań jobasy usynyldy.

«Arnaıy salyq tártibin qoldaný maqsatynda aýyl sharýashylyǵy kooperatıvteriniń jer telimi bolýy shartyn alyp tastaý usynylady. Budan basqa, otandyq aýyl sharýashylyǵy ónimderin óndirýshilerdi qoldaý úshin biryńǵaı jer salyǵyn qoldaný quqyǵyn saqtaý kózdelgen», - dep atap ótti mınıstr.

Ol sonymen qatar atalǵan zań jobasynda asyl tuqymdy maldardy májbúrli soıý jáne olardyń ólim-jitimi jaǵdaıynda belgilengen normatıvter sheginde QQS boıynsha jeńildikterdi qoldaný kózdelgenin jetkizdi.

Jalpy, usynylyp otyrǵan ózgerister qolaıly kásipkerlik orta qurý, áleýmettik-ekonomıkalyq damý boıynsha mindetterdi júzege asyrýǵa baǵyttalǵan.