Elimizde negizgi erejeleri zańǵa baǵynysty aktimen retteletin sotqa deıin retteýdiń jańa ınstıtýty – Apelásıa komısıasyn qurý usynylady. Bul týraly búgin ótken Úkimet otyrysynda ulttyq ekonomıka mınıstri Qýandyq Bıshimbaev aıtty, - dep habarlaıdy Qamshy.kz.

«Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» zań jobasy boıynsha sóılegen sózinde mınıstr sonymen qatar monıtorıń júrgizýge jatatyn iri salyq tóleýshiler tizbesin qurý tártibin naqtylanatynyn aıtty.

«Monıtorıń júrgizýge jatatyn salyq tóleýshilerden óz qyzmeti sheńberinde tabys alý maqsatyn kózdemeıtin uıymdar retinde komersıalyq emes uıymdardy jáne respýblıkalyq memlekettik kásiporyndar alyp tastaýdy usynamyz. Sebebi, atalǵan uıymdar memlekettik múlik týraly zańnamaǵa sáıkes eseptilik usynady», - dedi Q.Bıshimbev.

Ol atalǵan tizbege qala túzýshi sanatyna jatqyzylǵan jer qoınaýyn paıdalanýshy zańdy tulǵalar mindetti túrde engiziletinin aıtty.

Sonymen birge, aqparat almasý boıynsha halyqaralyq ózara is-qımyl, elektrondy aýdıtti engizý merzimderin uzartý, valúta aýystyrýdyń naryqtyń baǵamyn aıqyndaý  máselelerinde, beırezıdenttiń rezıdenttikti rastaý tártibi bóliginde túzetýler engiziledi.

Al kedendik ákimshilendirýge qatysty ýaqytsha saqtaý qoımalary, ýákiletti ekonomıkalyq operatorlardyń qyzmeti, kedendik tranzıtti ońtaılandyrý jáne kedendik operasıalardy júzege asyrý boıynsha túzetýler engizý usynylyp otyr.