Jańaózende ereýilge shyqqandardyń jalaqysy bir mıllıonǵa deıin barǵan, - dep habarlaıdy Qamshy.kz Tengrinews.kz-ke silteme jasap.
Jańaózende burǵylaý kompanıasynyń jumysshylary osymen besinshi kún ereýilge shyǵyp jatyr. Ereýil 30 qyrkúıekte bastalǵan. Qazirgi ýaqtta oǵan "Burǵylaý" JSHS-nyń 2000-ǵa taıaý jumysshysy qatysyp jatyr. Aıta keteıik, bul kásiporyn "ÓzenMunaıGaz" AQ-nyń merdiger uıymy. Ereýilge shyqqandardyń aıtýynsha, jumysqa shyqpaı qoıýlarynyń sebebi - tómen jalaqy jáne kásipodaq uıymynyń tóraǵasyn qýdalaý. Qazirgi ýaqytta ereýilshilerdiń alyp otyrǵan jalaqysynyń kólemi 100 myńnan 200 myń teńgege deıin eken.
"Bizde biryńǵaı eńbekaqy júıesi engizdi, odan bizdiń tarıf mólsherlemelerimiz túsip ketti. Qazir biz ony kóterýdi surap otyrmyz. Sonymen qatar, eki aı buryn biz kásipodaq uıymymyzdyń tóraǵasy etip Sáken Begalıevti saılaǵan edik. Ereje boıynsha jınalyp, daýys berý arqyly onyń úmitkerligin qoldadyq. Sol jınalysta "Burǵylaý" JSHS basshylyǵy da, zańger de boldy. Al endi tóraǵamyzǵa qatysty qýdalaý bastalyp otyr. Oǵan qatysty eki qylmystyq is jáne tórt ákimshilik is qozǵaldy, qazir ol úı qamaýynda. Oǵan qatysty barlyq isti jaýyp, bosatýyn talap etemiz", - deıdi "Burǵylaý" JSHS kásipodaq uıymynyń múshesi Yqylas Isataev.
Keshe "Burǵylaý" JSHS ókilderi kásiporyndaǵy jaǵdaıǵa qatysty pikir bildirdi. Dúısenbaı Taýshanov "Burǵylaý" JSHS-nyń dırektory bolyp bir aı buryn ǵana taǵaıyndalypty. Kásipodaq tóraǵasy Begalıev pen 1344 jumysshynyń qoly jınalǵan talap-aryz oǵan 23 qyrkúıekte túsipti.
Jumysshylar qaraýǵa bes pýnktti alǵa tartyp otyr. Birinshiden, eńbekaqy tóleminiń biryńǵaı júıesine (ETBJ) ótý jáne qazirgi ETBJ men 2014 jáne 2015 jyldardaǵy júıemen eseptegendegi aıyrma qarajatyn tóleý. Ekinshiden, 2014, 2015 jáne 2016 jyldardaǵy bonýstardy tóleý. Úshinshiden, olar jalaqyny segiz saǵattyq jumys kúni retinde jalaqy tóleýdi talap etip otyr, al JSHS eki aıǵa tórt saǵattyq jumys ýaqytyna ótken. Talaptyń tórtinshi pýnktinde 2015 jyl boıynsha eńbek demalysy boıynsha túsindirme aıtylǵan. Al besinshi pýnkti - kólik júrgizýshilerine jalaqyny qaıta eseptep berý, onyń ishinde arnaıy tehnıkamen jumys isteıtinder de bar.
"Burǵylaý" JSHS dırektory Dúısenbaı Taýshanov ETBJ-ǵa ótý boıynsha talaptyń oryndalýy múmkin emes ekenin aıtty. "Bul júıe boıynsha tek iri kompanıalar jumys isteıdi, biz olardyń enshiles kompanıasymyz. Biz qarapaıym JSHS-myz, merdigerlik jumystardy isteımiz. ETBJ men bizdiń jalaqymyzdyń aıyrmasy bar bolǵany 7-9 paıyz. Onyń ústine, kompanıa qazir shyǵyndalyp jatyr. Osy jyly biz 1 mıllıard teńgege qaryzdanyp qaldyq. Qarasha aıynyń jalaqysyn tóleý úshin kredıt aldyq", - deıdi Taýshanov.
"Mhindustry" JSHS bas dırektory Tólegen Ájibaev bolsa merdiger kompanıanyń jumys kólemin ýaqtyly oryndamaı jatqanyn aıtyp otyr. Osyǵan deıin kompanıa jyldam jumys istep, osy úshin bonýs alyp otyrsa, qazir mundaı molshylyq joq. Jyl basynan beri 151 uńǵyma qazylypty. Búginde taǵy 15-i qalyp otyr eken. Osydan keıin taǵy 34 uńǵyma bergeli jatyr.
"Bizde áli aıaqtalmaǵan uńǵymalar bar, jumys toqtap qaldy. Bul tótenshe jaǵdaıǵa ákep soǵýy múmkin", - dep málimdedi ol.
Basshylary jumysshylarynyń talaptaryna tańǵalyp otyrǵanyn da jasyrmady. Aıtýlarynsha, 2014 jyly jumysshylardyń jalaqysy bir mıllıon teńgege deıin barypty. Qazir ortasha jalaqy 350-400 myń teńge eken. "Ózenmunaıgaz" uńǵymalardyń sanyn azaıtyp, jalaqyny tómendetýdi surapty. Biz osynyń ózinde-aq 25 paıyz syıaqy berip otyrmyz", - dep atap ótti Ájibaev.
Qazirgi ýaqytta ereýilshiler men kompanıa basshylyǵy áli kelissózder júrgizip jatyr.
