QR Ortalyq memlekettik mýzeıiniń dırektory Nursan Álimbaı batyrdyń múrdesin elge jetkizý prosesiniń qalaı júzege asyrylǵanyn aıtyp berdi, - dep habarlaıdy Qamshy.kz Tengrinews.kz ke silteme jasap.
Aıta keteıik, búgin tańǵy ýaqytta Astanaǵa Keıki batyrdyń múrdesi jetkizilgen bolatyn.
"Batyrdyń múrdesi qazirgi ýaqytta QR Mádenıet jáne sport mınıstrliginde saqtaýly. Bul - bassúıek. DNQ-ny anyqtaý úshin kóp jumys qajet. Biz vengr antroplologtarymen kelisim jasastyq, olar taıaý kúnderi jumysqa kirisedi", - dedi Álimbaı. Ol múrdeniń jer qoınyna tapsyrylatynyn aıtty.
"Batyrdyń múrdesin elge qaıtarý jumystarymen bir top adam aınalysty. Onyń quramyna QR Mádenıet jáne sport mınıstrliginiń jáne Ortalyq memlekettik mýzeıiniń ókilderi endi. Mádenıet jáne sport mınıstrliginiń basshylyǵy Úkimettiń bastamasymen ónimdi eńbek etti. Men osy máseleni sheshýmen 8 jyl boıy aınalystym. Saıası máseleleri joǵary deńgeıde ótti. Reseılikter bizdiń ótinishimizge túsinistikpen qarady. Bul múrde Uly Petr atyndaǵy antropologıa jáne etnografıa mýzeıiniń antropologıa qorynda boldy. Shamamen 100 jyldaı saqtalǵan. "Kýnstkameraǵa" kirýge múmkindik boldy", - dedi Álimbaı.
Batyrdyń múrdesi Máskeýden Astanaǵa búgin, 6 qazanda tańǵy saǵat 5.00-de jetkizildi.
Esterińizge salsaq, bıyl 12 tamyzda Qazaqstannyń burynǵy premer-mınıstri Kárim Másimov RF Úkimet tóraǵasy Dmıtrıı Medvedevpen kezdesýi barysynda ótken júz jyldyqtaǵy ult-azattyq qozǵalystyń kóshbasshysy Keıki batyrdyń múrdesin elge qaıtarý týraly máseleni kótergen edi. Dmıtrıı Medvedev bul máseleni anyqtap, sheshý úshin qajetti tapsyrmalar beretinin aıtty. "Men aýyzsha jáne eger qajet bolsa, jazbasha tapsyrma berip, bul máseleniń anyq-qanyǵyn anyqtaıtyn bolamyn", - dep jaýap berdi Medvedev Másimovtiń ult kósemderiniń múrdelerin kómý úshin Qazaqstanǵa qaıtarý týraly ótinishine.
Keıki (Nurmaǵanbet) Kókembaıuly - 1916 jylǵy Torǵaıda bolǵan ult-azattyq kóterilisiniń batyry, ataqty mergen. Orta júz quramyndaǵy Qypshaq taıpasynyń Qulanqypshaq rýynan shyqqan. Qostanaı oblysy Amankeldi aýdanynyń Baıtýma qopasynda dúnıege kelgen. Ol Reseı patshasynyń 1916 jylǵy maýsym jarlyǵy sebep bolǵan Torǵaı qazaqtarynyń ult-azattyq kóterilisine alǵashqy kúnderinen belsene aralasyp, sol kóterilisti uıymdastyrýshylardyń biri boldy. Qazaqstan ulttyq ensıklopedıasyndaǵy málimet boıynsha, ol Torǵaıda qyzyl ásker qolynan aıýandyqpen óltirilgen. Onyń basy qazir Sankt-Peterbýrgtegi antropologıalyq qordyń kýnstkamerasynda saqtaýly boldy. Keıki batyr Kókembaıulynyń urpaqtary Qostanaı oblysynyń Amangeldi aýdanyndaǵy Aqtas, Tasty eldi mekenderinde turady. 1996 jyly Keıki batyrdyń 125 jyl tolýyna baılanysty as berilip, eskertkish ornatyldy.
