Almaty oblysy Jambyl aýdanynda aıýandyqpen óltirilgen úsh azamattyń týystary Elbasydan atý jazasyn qaıta engizýdi surady, - dep habarlaıdy Qamshy.kz.

Jarqynbek Doldanuly, Muqıat Zarlyhanuly jáne Qadylbek Álimhanuly esimdi úsh azamattyń Uzynaǵash bazaryna mal satýǵa kelip joǵalǵanyn, keıin olardyń aıýandyqpen óltirilgenin jazǵan bolatynbyz. Qandy qylmysqa qatysy bar degen kúdikpen Talǵat Súleımenov, Murat Ońalbaev esimdi eki azamat qamaýǵa alynǵan.

Tóbeden túskendeı bolǵan aýyr qylmystan esterin jıyp úlgirmegen olar mundaı qylmyskerler úshin ólim jazasyn qoldanýdy qaıta engizý kerek dep sanaıdy.

«Meniń ǵana ótinishim emes shyǵar, ólim jazasyna engizilgen moratorııdi alyp tastaýdy suraımyz. Áıel zorlaǵan, aıýandyqpen kisi óltirgender ólim jazasyna kesilýi kerek», - deıdi marqumdardyń biriniń týysy Erkin Beısekeıuly.

Marqumdardyń týystary qylmysty tergeý barysyna kóńilderi tolmaıtynyn, polısıa qyzmetinde salǵyrttyq baryn aıtady. Olardyń aıtýynsha, qylmys ornynda tergeýge sep bolatyn birshama aıǵaq zattar sol jerde qalyp qoıǵan. Kýágerlerden de tolyq jaýap alynbaǵan.

«Osy isti aıaǵyna deıin jetkize alatyn memlekettik organdarǵa, «Nur Otan» partıasyna senemin. Bul qylmys eki adamnyń isi emestigin tolyq tekserip, halyqtyń razylyǵyn alady dep senemin. Qylmysty ashýǵa talpynbaǵan Uzynaǵash polısıasynyń jaýapkershiligin anyqtaýdy suraımyz», - deıdi aıýandyqpen óltirilgen úsh azamattyń týysy Tursyn Ámirbaıuly.

Qaza bolǵan úsh jigittiń artynda áıelderi jesir, segiz bala jetim qaldy. Marqumdardyń týystary memlekettik mekemelerden osy otbasylarǵa materıaldyq járdem kórsetilse dep tileıdi.