«Aq altyndy» óńirge issaparmen kelgen Qazaqstan Respýblıkasy Senatynyń depýtaty Qýanysh Aıtahanov aýdan ákimdiginiń úlken májilis zalynda maqtaaraldyqtarmen kezdesti.
Senator Elbasynyń «Ult jospary: 100 naqty qadam» jáne «Nurly jol» baǵdarlamalary men jer reformasy boıynsha qolǵa alynyp otyrǵan jumystar jaıynda baıandady. Jer reformasy boıynsha qurylǵan komısıanyń nátıjeli jumys atqarǵanyn, Elbasy komısıanyń moratorııdi taǵy bes jylǵa uzartý týraly usynysyn qabyl alǵanyn aıtty.
– Qazir úlken problemanyń biri – qalada da, aýylda da turǵyn úı salýǵa ınfraqurylymy júrgizilgen daıyn jer ýchaskeleri joq. Bıyl respýblıkada jerge kezekke turǵan adamdar 1 mıllıon 400 myńǵa jetken. Jer kodeksinde Qazaqstan azamattaryna ómirinde bir ret 10 sotyqtan jer berý týraly talap ta bar. Osynyń bárin eskere kelip, Senat depýtattary turǵyn úı salý úshin aýyl sharýashylyǵy jerinen jer telimin berý máselesin kún tártibine qoıyp otyrmyz, – dedi Q.Aıtahanov.
Basqosýda senator jurtshylyqty ashyq suhbatqa shaqyryp, olardyń usynys-pikirlerine qulaq túrdi. Eńbek ardageri, baıyrǵy agronom Mekenbaı Atabaıuly bıyl da maqtaaraldyq dıqandardyń aǵyn sý tapshylyǵynan zardap shegip, qınalǵanyn ashyna aıtyp, bul máseleni joǵary deńgeıde durys sheshilýin ótindi. Sondaı-aq, Maqtaaral – Shardara tasjoly tezirek iske qosylsa, eldi mekender tolyq gazdandyrylsa degen tilegin jetkizdi.
Qazybek bı aýyldyq okrýginen kelgen 80 jastan asqan eńbek ardageri Sembek Jumatov sýarmaly jerdiń sorlanyp, tuzdanýy jyldan-jylǵa órship bara jatqanyna alańdaýshylyq bildirip, tik drenajdardy kóptep iske qosyp, onyń sapaly jumys isteýin baqylap, qadaǵalaý qajettigin aıtty.
Aýdandyq máslıhattyń depýtattary Baqyt Jumanovpen Marat Dildábekov senatordan eldi mekenderdegi ishki joldardyń 80 paıyzy jaramsyzdanyp tozǵandyqtan, oǵan oblystyq búdjetten qarjy bóldirýge yqpal etýin ótindi. Sýarmaly jerdiń satyp alý baǵasy tómendetilip, bıdaı egetin jerlerdi memleket ıeligine alý kerek degen usynystaryn bildirdi.
Kezdesý sońynda Q.Aıtahanov turǵyndardyń árbir kótergen máselesi ózekti ekenin tilge tıek etip, aldaǵy ýaqytta onyń tıanaqty sheshimin tabýyna kúsh salatynyn aıtty.
Sábıt QALDYBAEV. Maqtaaral aýdany. «Ońtústik Qazaqstan». http://okg.kz/
