QR Premer-Mınıstri Kárim Másimov Ońtústik Qazaqstan oblysyna jumys sapary barysynda kásipkerlermen aýyl halqyn mıkronesıeleý jáne jumyspen qamtý máselelerin talqylady.Sonnymen birge, óńdeý kásiporyndarynyń problemalaryn sheshý úshin Premer-Mınıstr Aýyl sharýashylyǵy mınıstrligine múddeli memlekettik organdarmen birge kásiporyndardyń usynystaryn jınaýdy tapsyrdy - dep habarlaıdy qamshy.kz OQO ákiminiń baspasóz qyzmetine silteme jasap.
Sońǵy jyldary Ońtústik Qazaqstan oblysynda AÓK-niń barlyq baǵyttary boıynsha turaqty ósý baıqalýda. Aımaqtyq Indýstrıalandyrý kartasynyń 165 jobasynyń 65% aýyldyq jerlerge negizdelgen. Qazaqstanda aýyl sharýashylyǵynyń negizgi kólemin jeke qosalqy sharýashylyqtar shyǵarady (shamamen ettiń 70% jáne súttiń 80%). Sonymen qatar, aýyl sharýashylyǵy taýarlaryn óndirýshilerge tutas bir problemalar kesheni kedergi keltiredi, ózekti máselelerdiń ishinde nesıe qarajatynyń jetispeýshiligi jáne aýyl sharýashylyǵy shıkizatyn daıyndaý jáne jınaýdyń álsiz damyǵan júıesi bolyp otyr.
Shaǵyn bıznesti, onyń ishinde shaǵyn agroqurylymdardy qoldaý úshin elimizde «Jumyspen qamtýdyń jol kartasy-2020» baǵdarlamasy jumys jasaıdy, ony júzege asyrýǵa Úkimet basa nazar aýdarady. 2016 jyly JQJK-2020 aıasynda Ońtústik Qazaqstan oblysyndaǵy aýyl kásipkerligin damytýǵa mıkronesıe berýge 7 237,5 mln teńge berilgen. Birinshi jartyjyldyqta baǵdarlamanyń 736 qatysýshysy zaemdar alýshylar boldy, onyń ortasha mólsheri 2,6 mln teńgeni qurady.
Premer-Mınıstrmen kezdesýde agrarlyq sektor ókilderi aýyl sharýashylyǵy ónimderin jetkizý jáne saqtaýǵa, sondaı-aq kólik tarıfterine qatysty máselelerdi kóterdi. Budan ózge, aýyl sharýashylyǵyn óńdeýshiler sapaly shıkizat tapshylyǵy jaıly aıtty, sonyń kesirinen aımaqtaǵy kóptegen kásiporyndar tolyq qýattylyqta jumys isteı almaı otyr. Atap aıtqanda, oblystaǵy sút zaýyttarynyń júktemesi 81% (qýattylyǵy 10,7 myń tonna 17 kásiporyn), et kombınattarynyń – 73% (qýattylyǵy 10,7 myń tonna 16 kásiporyn). Aýyl sharýashylyǵy taýarlaryn óndirýshiler úshin ózekti máseleler boıynsha aýyl sharýashylyǵy vıse-mınıstri Q. Aıtýǵanov, densaýlyq saqtaý jáne áleýmettik damý vıse-mınıstri B. Nurymbetov sóz sóıledi. Aımaqta týyndaǵan problemalardy sheshýge jáne otandyq ónimderdiń básekege qabilettiligin arttyrýǵa kólik-logıstıkalyq ortalyqtar ashý kómektesetini atap ótildi.
Ońtústik Qazaqstan oblysy ákimi B.Atamqulovtyń málimetinshe, qazirgi ýaqytta Shymkentte halyqaralyq standarttar boıynsha kólik-logıstıkalyq ortalyq qurylysy boıynsha joba ázirlenýde. Keshenniń jalpy aýdany 90 gektardan asady, munda aýyl sharýashylyǵy ónimderin saqtaýǵa, oraýǵa jáne jóneltýge barlyq jaǵdaı jasalady. Osyndaı qoımalardy Maqtaaral jáne Saryaǵash aýdandarynda jáne Túrkistanda salý josparlanǵan.
AÓK ókilderimen kezdesýlerdiń nátıjesin qorytyndylaı kele, Kárim Másimov Ońtústik Qazaqstan oblysynyń joǵary agrarlyq áleýetin atap ótti. Óńdeý kásiporyndarynyń problemalaryn sheshý úshin Premer-Mınıstr Aýyl sharýashylyǵy mınıstrligine múddeli memlekettik organdarmen birge kásiporyndardyń usynystaryn jınap, Úkimetke qaraýǵa engizýdi tapsyrdy.
