Shubar aýyl okrýginde 2010 jyly iske qosylǵan "Shubar asyl tuqymdy kesheni" JSHS shoshqa ósirip, bordaqylaýmen aınalysady. Bul jobanyń jalpy quny 141 mln. teńgeni quraıdy, qarjy kózi - UQ "Ońtústik ÁKK" aksıonerlik qoǵamy,-dep habarlaıdy Ordabasy aýdany ákiminiń baspasóz qyzmeti.

Bul keshende 35 adam turaqty jumyspen qamtylǵan. 

Keshende búginde 5000 shoshqa bar. 

"Bıznestiń jol kartasy 2020" memlekettik baǵdarlamasy aıasynda ınvestısıalyq quny 70,0 mln. teńgege mal soıý sehy iske qosyldy. Qýattylyǵy - táýligine 5000 tn.

Seriktestik tóraǵasy S.Valıevtyń málimdeýinshe bul keshen aıyna 30 tonna et shyǵarady. Munda etti tekseretin arnaıy zerthana da jasaqtalǵan.

Aýdan ekonomıkasynyń negizgi salalarynyń biri – aýyl sharýashylyǵy.  2015 jyldyń bes aıynda aýyl sharýashylyq salasynda 6 mlrd 353 mln. 900 myń teńgeniń ónimi óndirilip, naqty kólem ındeksi 111,2 paıyzdy qurady. Onyń ishinde mal sharýashylyǵynyń óndirisi 5 mlrd 691 mln. 800 myń teńge, naqty kólem ındeksi 112,2 paıyz, al egin sharýashylyǵy boıynsha 662 mln. 100 myń teńgeniń ónimi óndirilip, naqty kólem ındeksi 100 paıyzdy qurady.

Ordabasy aýdany qaı jaǵynan alsa da aýyl sharýashylyǵyn óristetip keledi. Búkil oblystyń ekonomıkasyn ilgeriletýge tıgizer áseri kóp. Tipti arnaıy zerthana jasalýynyń ózi aýdanda mal sharýashylyǵyna úlken kóńil bólinip kele jatqanyn bildirse kerek. Munyń barlyǵy túptiń túbinde ata kásipti damytýda úlken maqsattar qoıylǵanyn kórsetse kerek.