Oblystyq aýyl sharýashylyǵy basqarmasynyń basshysy S.Turbekov óńirlik komýnıkasıalar qyzmetinde ótken brıfıńte Táýelsizdiktiń 25 jyly ishinde salada jetken jetistikter týraly aıtyp ótti.
Basqarma basshysy baıandaǵandaı, toqsanynshy jyldardyń basynda kolhoz-sovhozdar taratylyp, onyń ornyna kooperatıvter quryldy. Alaıda, kooperatıv múlki bankterdiń qaryzyn jabýǵa jumsaldy. Sonyń saldarynan onyń múshelerine paı úlesin tóleý qıyndaı tústi. Bul tyǵyryqtan qutylý úshin kooperatıv múshelerine ujymnan bólinip shyǵyp, jeke sharýashylyq qurýǵa ruqsat etildi. Osy ózgeristen keıin oblysta aýyl sharýashylyǵy jandanyp, aýyldarda tirshilik qaınaı bastady. 1999 jyly óńirde 20 myńnan astam jeke aýyl sharýashylyǵy qurylymy bolǵan. Búginde olardyń sany 70 myńnan asyp-jyǵylady. Endi qazir, kerisinshe, sharýalardy kooperasıalarǵa biriktirý úrdisi júrýde.
Egin sharýashylyǵy boıynsha júrgizilgen ártaraptandyrý jumystarynyń arqasynda maıly daqyldardyń egis kólemi 1991 jylmen salystyrǵanda 73 myńnan 80 myń, baqsha 49 myńnan 59 myń, kókónis 27 myńnan 40,4 myń, kartop 9 myńnan 15,3 myń gektarǵa artqan. Egis alqaptarymen birge ónim kólemi de birshama ósken. Máselen, táýelsizdikke qol jetkizgen jyly oblysta 163,4 myń tonna kókónis óndirilse, bıyl odan 866 myń tonna ónim jınalyp otyr.
S.Turbekovtiń aıtýynsha, 2003 jyly aýyl sharýashylyǵyndaǵy jalpy ónimniń 72 paıyzyn ósimdik sharýashylyǵy quraıtyn. Iaǵnı, tórt túlikten alynatyn ónim kólemi óte tómen boldy. Qazir memlekettik qoldaý men jergilikti atqarýshy bıliktiń júıeli jumystar uıymdastyra bilýiniń arqasynda mal sharýashylyǵynyń úlesi 45 paıyzǵa ósti.
– Aýyl sharýashylyǵy ónimderiniń ulǵaıýy sharýalardyń ıeligindegi jerdi kútip-baptaýynyń jáne jer óńdeýde jańa agrotehnologıalardy qoldanýdyń arqasy dep bilemin. Aýyldyń jaǵdaıy jaqsy bolsa, memleket te myqty bolady. Bıylǵy kórsetkishterge toqtalsam, 470 myń tonna astyq jınaldy. Ortasha túsimdilik gektaryna 22 sentnerdi qurap, táýelsizdik kezeńindegi eń joǵary ónimdilikke qol jetkizdik. Sonymen birge, bıyl 295 myń tonna maqta jınalady dep kútilýde, – dedi S.Turbekov.
Táýelsizdik jyldary ishinde agrosektor salasynda jetken ózge de jetistikter týraly baıandaǵan basqarma basshysy brıfıńten soń jýrnalıserdiń suraqtaryna jaýap berdi.
Á.NURJIGITULY.
«Ońtústik Qazaqstan».
