Maqtaral aýdany ákiminiń apparatynda maqta sharýashylyǵynyń búgini jáne bolashaǵy máselesinde beıresmı jınalys bolyp ótti. Jıynǵa aýdan ákimi Ǵalym Ismaılov, OQO aýyl sharýashylyǵy basqarmasynyń basshysy Serik Turbekov jáne Qazaq maqta sharýashylyǵy ǵylymı-zertteý ınstıtýtynyń basshylary, maqta zaýyttary men pýnktteriniń ókilderi qatysty.
Maqtaral aýdany aýmaǵynda maqta tuqymy sharýashylyǵyn damytý, maqta ónimin ulǵaıtý máseleleri qarastyrylǵan jıynda Qazaq maqta sharýashylyǵy ǵylymı-zertteý ınstıtýtynyń basshysy Ibadýlla Úmbetaev maqta tuqymy sharýashylyǵyn uıymdastyrýdaǵy negizgi kemshilikterdi atap kórsetti. Onyń aıtýynsha, tuqym egiletin egistikterdiń bytyrańqylyǵy, tuqymdyq alqaptarda agrotehnıkalyq talaptardyń saqtalmaýy, maqta qabyldaý kezinde zaýyttarda elıtalyq jáne reprodýksıalyq daıyndalǵan maqtanyń belgisiz taýarlyq maqtalarmen aralasýy – maqta sortynyń keleshegin joıady eken. Sonymen qatar, kóp sorttylyq (tuqymnyń zaýytta aralasyp ketýi), maqta zaýyttarynyń sebiletin tuqymdy daıyndaýǵa jáne daıyndaýǵa arnalǵan arnaıy jabdyqtarmen jabdyqtalmaýy da tuqym sharýashylyǵyn damytýda kedergi jasap jatqanyn ǵalym atap ótti.
OQO aýylsharýashylyǵy basqarmasynyń basshysy Serik Turbekov «Maqta sharýashylyǵyn kooperasıalaý mehanızmi» jobasyn usyndy. Joba boıynsha maqta zaýyttary men sharýalardy biriktirip «Aksıonerlik qoǵam (AQ)» qurý kerektigi aıtyldy jáne osy arqyly zaýytta aksıasy bar sharýalardyń zaýytty basqarý múmkindikteri ashylady. «Usynylyp otyrǵan maqta sharýashylyǵyn kooperasıalaý mehanızminiń arttyqshylyǵy sharýalar zaýytpen birigip túpkilikti nátıjege qol jetkizýge yntaly bolady jáne qaıta óńdeý kásiporyndary qajetti shıkizatpen turaqty túrde qamtamasyz etiledi. Ári qaraı OQO toqyma óndirisi kásiporyndarymen ózara tıimdi kooperasıalaý múmkindigi bar» - deıdi Serik Turbekov.
