Ońtústik Qazaqstan oblysynda túıe sútin óńdeıtin jańa zaýyt salynbaq.Bul joba osy jyldyń 28-29 sáýirinde ótken «Ontustik Invest-2016» halyqaralyq ınvestısıalyq forýmy aıasynda qol qoıylǵan yntymaqtastyq týraly memorandým sheńberinde júzege asyp otyr.
Sheteldik «Golden Camel Group LTD» kompanıasy óńirde ınvestısıa quny 8 mlrd. 30 mln. teńgeden astam qarjy bolatyn túıe sútin qaıta óńdeý jolymen qyshqyl sút ónimin óndiretin kásiporyn salmaq. Táýligine 100 tonna túıe sútin óńdeýge qaýqarly óndiristiń qurylysy qarasha aıynda bastalatyn bolady.
Túrkistan qalasynda boı kóteretin bul zaýyt iske qosylǵanda 180 adam jumys ornymen qamtylady. Jańa zavodtyń ónimi Qazaqstannyń basqa óńirleriniń naryqtary men Qytaı memleketi jáne Keden odaǵy elderine eksporttaý kózdelýde.
Aıta keteıik, halyqaralyq ınvestısıalyq forýmy aıasynda OQO ákimdigi men sheteldik jáne otandyq kompanıalar ókilderi arasynda quny 2,5 mlrd. AQSH dollary bolatyn 40-tan astam yntymaqtastyq memorandýmyna qol qoıylǵan bolatyn.
Búginde atalǵan jobalar kezeń-kezeńimen iske asyrylý baǵytynda birqatar jumystar atqarylýda. Bul óz kezeginde oblysymyzdyń áleýmettik-ekonomıkalyq damýyna serpilis beretini anyq. Sonymen birge óńirdiń aýyl sharýashylyǵy jóninen damýy da alǵa basatyny aqıqat.
