Ońtústik Qazaqstan oblysy, Saryaǵash aýdanynda búginde 1891 gektar júzim alqaby bar. Onyń ónim beretin 1648 gektary qyzmet etedi. Sharýalar bıyl sol jerden 13184 tonna ónim alyp otyr. Bıylǵy gektarynan ortasha 80 sentner ónim jınaldy, dep habarlaıdy oblys ákiminiń baspasóz qyzmeti.
Júzimdi baptaý jáne qaıta óńdeý - jumysshylar men mamandardyń arnaıy bilimin, tájirıbesin jáne kásibı daǵdysyn qajet etetin kúrdeli, eńbek kóp jumsalatyn tehnologıalyq úderis. «Saryaǵash jer syıy» JSHS-de Fransıadan 17 myńǵa tarta alasa surypty kóshetter alynǵan. Bul egistiktiń jalpy kólemi 54 gektarǵa sozylyp jatyr. Osy egistikte jumys isteýdiń ózi ońaı sharý emes. Kóshetterdi otyrǵyzý, olardy kútip baptaý, ónimin alý óte kúrdeli ári jaýapty jumys. Onyń ústine bul bizdiń eldegi dástúrli aǵashtan ónim alý emes, bunyń ereksheligi sonda, qortyq aǵashtar dep atalýynda. Olardyń boıynyń uzyndyǵy ary ketse 2-2.5 metrge ǵana jetedi. Ońtústik Qazaqstan oblysynda júzim sharýashylyǵy jaqsy jolǵa qoıylǵan. Ońtústik óńiriniń turǵyndary baý-baqshany keńeıtip, júzimdikti molaıtýmen aınalysady. 2013 jyldyń basynda jańa tuqymdyq ónimder alynǵan. 2013 jyly júzim sharýashylyǵyn nyǵaıtý maqsatynda úkimetten 513 mln. teńge memlekttik sýbsıdıa alynyp otyr. Jeke sharýashylyq seriktestigi 545 gektar júzim men 115 gektar kóshet aǵashtaryn otyrǵyzdy. Bul aımaqta tek júzim, alma ǵana emes alsha, lımon, anar, banan, kıvı jáne t.b. ónimderin óndirýge de jol ashqan. Onyń ústine osy aımaqtyń aýa raıy óte qolaıly, halqy eńbekqor. Baý-baqsha men júzim sharýashylyǵynyń kóbeıe túsýi naryqta vıtamındik ónimniń suranysynyń artýyna, sondaı-aq otandyq shyryn, sharaptyń óndelýine de kóp múmkindik ashyp otyr.
Jınalǵan júzimniń 4 313 tonnasy asqanalyq bolsa, 8871 tonnasy tehnıkalyq sorttar. Bıyl jyldaǵydan mol ónim alyp otyrǵandyǵyn aıtqan dıqandar jınalǵan 8871 tonna tehnıkalyq júzim sortyn aýdandaǵy «Caspian Food» JSHS-i men «Semıreche» JSHS-niń sharap zaýyttaryna ótkizgenin aıtady. Al qalǵan ónim ishki naryqqa jáne elimizdiń basqa oblystary men 500 tonnasy Reseı Federasıasyna jóneltilgen.
Aıta keteıik, ótken jyly 1648 ga júzim alqabynan 13 myń tonna ónim alyndy. Gektarynan ortasha 79,2 sentner ónim jınalǵan.
