Shymkenttegi «Kórme» ortalyǵynda «Tamaq ónerkásibi salasyndaǵy jabdyq pen tehnologıalar» - AgroProm Shymkent 2016 kórmesi ótip jatyr.
Kórmeni QR Aýyl sharýashylyǵy mınıstrligi, «Atameken» Ulttyq kásipkerler palatasy jáne «Ońtústik» ındýstrıaldyq aýmaqty basqarý kompanıasy» JSHS qoldaýymen, Ońtústik Qazaqstan oblysynyń ákimdigi uıymdastyryp otyr.
Maqsat – agroónerkásip keshenine ınvestısıa tartý, jańa tehnologıalardy jáne jabdyqtardy tanystyrý, shaǵyn jáne orta bıznesti damytý.
«Mundaı kórmeler tamaq sektory iri óndirýshileriniń arasyndaǵy bıznes baılanysty nyǵaıtýǵa, jalpy ındýstrıada tájirıbe almasýǵa sep bolady. Qazir bizdiń óńirde tamaq ónerkásibin damytýǵa erekshe nazar aýdarylýda. Etti qaıta óńdeıtin 43, sútti qaıta óńdeıtin 38, jemis-kókónis ónimderin qaıta óńdeıtin 35 kásiporyn jumys isteıdi. Investorlar tartylyp, ózge de jumystar tıisti deńgeıde atqarylýda», - deıdi OQO kásipkerlik ındýstrıaldy-ınnovasıalyq damý jáne týrızm basqarmasynyń basshysy Marat Qarabaev.
Kórmede azyq-túlik, sýsyn, jemis-jıdek, et jáne shujyq ónimderi arqyly tutynýshylardyń kóńilinen shyǵyp júrgen 60-qa jýyq kompanıa qala turǵyndaryna óz taýaryn usyndy. Olardyń arasynda Ońtústik Qazaqstan oblysynan bólek, Jambyl, Almaty óńirlerinen kelgen kompanıalar da bar.
Biri ári biregeıi – kórshi Jambyl oblysynyń 80 jyldyq tarıhy bar «Merki syr zaýyty».
«40 túrli sút ónimin shyǵaryp, 140 adamdy jumyspen qamtyp otyrmyz. Zaýyt ashylǵan kúnnen bastap tutynýshylarymyzǵa tek tabıǵı ónim usynyp kelemiz. Qarjylyq jaǵdaıǵa qaramastan jumys turaqtylyǵyn saqtap qaldyq. Al baǵasy halyqtyń qaltasyna tıimdi. Ońtústik Qazaqstan oblysy turǵyndary da bizdiń ónimderimizdiń turaqty tutynýshylaryna aınalǵanyn qalaımyz», - deıdi dırektory Dastan Aıtólenov.
Qala turǵyndary men qonaqtary otandyq ónim óndirýshilerdiń taýaryn arzan baǵada satyp alýlaryna bolady.
