Shardaralyq sharýalar bıyl baý-baqshadan mol ónim alyp otyr. Aýdan boıynsha osy maýsymda 59 myń gektar jerge aýyl sharýashylyǵy ónimderin ekti, onyń 11 myń gektarǵa jýyǵy baý-baqsha daqyldary.
Ásirese, kúnniń kózi jylynysymen egistik alqapqa shyǵyp ketken dıqandar qaýymy qaýyn-qarbyz sekildi erte pisetin ónimderin puldap úlgerdi.
Aýdandyq aýyl sharýashylyǵy jáne jer qatynastary bóliminiń málimetine súıensek, búginge deıin shardaralyq sharýalardyń 3338 gektar egis alqabynan 83 450 tonna qaýyn-qarbyz saýdaǵa shyǵarylǵan. Onyń ishinde, ózimizdiń naryqtan bólek, 50 000 tonnasy Reseı memleketine eksporttalǵanynyń ózi úlken kórsetkish. Qalǵany ózimizdiń soltústik oblystarǵa jóneltilipti. Munyń ózi aımaqtyń qarqyndy damyp, alǵa úlken maqsattar qoıǵanyn ańǵartsa kerek. Jalpy ónimniń eksporttalýy onyń sapasynyń joǵarylyǵyn, básekege qabilettigin bildiretini aqıqat qoı. Mundaı jemisti jobalar aldaǵy ýaqytta jalǵasyn tapsa, óńirdiń ekonomıkalyq áleýeti arta túsetini de bar.
Mamandardyń esebi boıynsha gektarynan ortasha 250 sentnerden ónim alǵan aýdan dıqandarynyń kóńilderi toq dep aıtýǵa bolady. Baý-baqsha ónimderiniń basym bóligi endi pisip jatqanyn eskersek, bul kórsetkish kún saıyn arta túspek
