Otyrar aýdanynda óndiriletin ulttyq sýsyn – shubat búginde búkil Qazaqstan naryǵyn qamtyp otyr. Ulttyq brendimizdiń baǵasy qaltaǵa qonymdy, sapasy joǵary. «Otyrar sút et» jaýapkershiligi shekteýli seriktestigi tipti, jergilikti balabaqshalar men mektep balalaryn bir mezgil sút ónimderimen qamtamasyz etip keledi.
«Otyrar sút et» STK-synyń qurylǵanyna nebári 3 jyl. Kásiporynda búginde kúnine 1500 lıtr sút pen 1000 lıtr aıran óndiriledi. Al, shubattyń táýliktik shyǵarylymy eki myń lıtrge jýyqtaıdy. Saqtalý merzimine qaraı Astana men Almaty qalalaryna jóneltilýde. Negizgi tutynýshylar – jergilikti turǵyndar.
«Otyrar sút et» kooperatıvi súttiń maılylyǵyn saqtaı otyryp, ónim daıyndaıtyndyqtan, ásirese, shubattyń saqtalý merzimi uzaq emes. Endi ujym jańa ınovasıa jelisimen untaqtalǵan shubat óndirýdi josparlap otyr. Túıe súti aǵzaǵa óte paıdaly bolǵandyqtan, ónimniń bul túrine suranys joǵary,-deıdi mamandar.
«Maıaqum shubaty». Aty aıtyp turǵandaı, shıki ónim osy jerdegi 70-ke jýyq sharýadan alynady. Keıbir qospalar men qajetti qurylǵylar Reseıden ákelinedi. Seriktestik jýyrda «Maksımým» qarjy uıymynan 100 mıllıon teńge nesıe aldy. Qarajat arnaıy mal bordaqylaý oryndaryn ashyp, untaqtalǵan túıe sútin óndiretin qurylǵylarǵa jumsaldy. Qazir bul is tóńireginde 50-ge tarta jergilikti azamat ter tógip júr.
Baqtıar Asylhanuly, «Otyrar-sút-et» STK-nyń tóraǵasy
Etti vakýmdap óńdep, túıe sútin qurǵaqtaı eksportqa shyǵarýǵa daıyndalyp jatyrmyz. Óıtkeni, qazir túıe sútin biz 36-aq táýlik saqtaımyz. Al, qurǵaq túrinde ony 1 jylǵa deıin saqtaýǵa bolady. Sol sebepti de biz osy jumystardy qolǵa alyp otyrmyz. Memleketten úlken kólemde qarjy alǵanbyz. İsimizdi sóıtip bastaǵanbyz. Mine, jumysymyz jandanyp otyr.
