Otyrar aýdanynyń ákimi Erlan Aıtahanov Maıaqum, Baltakól aýyl okrýgterindegi «Otyrar-Sút-Et» selolyq tutyný kooperatıvi men «Otyrar Agro ónimderi» jaýapkershiligi shekteýli seriktestiginiń jumysymen tanysyp, dıqandarmen kezdesti dep habarlaıdy OQO ákimdiginiń baspasóz qyzmeti. Qazirgi tańda kooperatıv quramyna jergilikti «Serikbaı-B», «Meıirbek LTD», «Úsenov-N» jaýapkershiligi shekteýli seriktestikter kiredi. "Agrobıznes - 2020" memlekettik baǵdarlamasy aıasynda órisin keńeıtip otyrǵan kooperatıv bıyl 190 gektar alqapqa «Jıenbaı» sortty qaýyn, 130 gektaryna jońyshqa, 100 gektaryna júgeri daqyldaryn ekken. Al byltyr «Otyrar Agro ónimderi» JSHS 400 ga jerge tamshylatyp sýarý ádisimen júgeri daqylyn egip, gektaryna 110 sentnerden ónim alǵan bolatyn. Sonymen qatar 3 ga jylyjaı salý, 1200 ga jerge tamshylatyp sýarý ádisin engizý, 32 dana aýyl sharýashylyǵy tehnıkalaryn alý, 9 dana tereń qopsytý quraldary satyp alynyp, 2900 ga jer aıdaý josparlary tolyq oryndaldy.
Tyń tehnologıalardy paıdalaný arqyly mol ónimge qol jetkizgen sharýashylyqtyń ónimderine suranys joǵary bolyp otyr. Búginde Reseıdiń Máskeý, Sankt-Peterbýrg qalalarynan kelgen kásipkerler ózderi tasymaldap áketýde. Bul – sharýalardyń tókken teri men eńbeginiń jemisi.
Al, Baltakóldegi dıqandar ǵylymǵa negizdelgen, sońǵy ozyq tehnologıalardy paıdalanyp 104 gektar alqapqa tamshylatyp sýarý ádisimen pıaz ekken bolatyn. Dıqandar ár gektarynan 60 tonnadan ónim alýda. Bul ónimder kelisim-shart boıynsha «Otyrar qoıma» JSHS-niń qoımasynda saqtalady. Sonymen qatar, 50 gektar alqapqa tamshylatyp sýarý ádisimen kúzdik pıaz egilip bitti.
Aýdan basshysy dıqandardyń ónimdi eńbegine rızashylyǵyn bildirip, jumystaryna tabys tiledi.
