Memleket basshysy Nursultan Nazarbaev astyq jınaý naýqanynyń tabysty aıaqtalýyna baılanysty elimizdiń agroónerkásip kesheni eńbekkerlerine quttyqtaý joldady, - dep habarlaıdy Qamshy.kz Aqordanyń baspasóz qyzmetine silteme jasap.

"Qazaqstanda jıyn-terin naýqany aıaqtalyp keledi. Bul – aýyl eńbekkerleri, agroónerkásip kesheni jáne búkil elimiz úshin azyq-túlik qaýipsizdiginiń deńgeıin aıqyn kórsetetin asa mańyzdy oqıǵa.

Bıylǵy naýqan nátıjesin Táýelsizdiktiń 25 jyldyǵyna tamasha tartý dep baǵalaýǵa bolady. Óıtkeni, bul joly jınalǵan astyq mólsheri – osy kezeńdegi eń iri jetistiktiń biri.   

Astyqtyń jalpy kólemi 23 mıllıon tonnadan asty,  bul – byltyrǵydan bir jarym esedeı artyq kórsetkish.

Aqmola, Soltústik Qazaqstan jáne Qostanaı oblystarynyń dıqandary 5 mıllıon tonnadan astam astyq aldy. Qaraǵandy oblysynda mıllıon tonnadan astam astyq jınalyp, buryn-sońdy bolmaǵan kórsetkishke qol jetkizildi", - degen prezıdent jıyn-terin naýqanynyń nátıjelerine kóńili tolatynyn bildirdi. 

"Aýyl sharýashylyǵy salasyndaǵy ózge dándi daqyldar boıynsha da jıyn-terin naýqanynyń nátıjeleri kóńil qýantyp otyr. Qyzylorda oblysynda kúrishten rekordtyq ónim alyndy. Almaty, Jambyl jáne Ońtústik Qazaqstan oblystarynda kókónis pen baý-baqsha daqyldarynyń ónimdiligi edáýir artty. Maıly daqyldar kólemi 1,2 ese ulǵaıyp, sońǵy bes jyldaǵy eń joǵary kórsetkishke jetedi dep boljanýda.   

Osynyń barlyǵy meılinshe mol ter tógýdi, udaıy qamqorlyqty, zor qajyrlylyqty, bilim men tájirıbeni talap etetin salanyń biri – egin sharýashylyǵynyń tabysty damyp kele jatqanyn daýsyz dáleldeıdi. Bul saladaǵy azamattardyń bárin quttyqtap, birden jemis bere qoımaıtyn jer tósindegi beınetti eńbekteri úshin zor alǵys bildiremin.

Ótken shırek ǵasyr ishinde aýyl sharýashylyǵynyń qalaı órkendegenin, Qazaqstannyń agrarlyq derjava retindegi óz jaǵdaıyn jaqsartyp qana qoımaı, azyq-túlik naryǵyndaǵy jańa belesterdi ıgerip kele jatqanyn kórip otyrmyz", - deıdi Elbasy.

Prezıdent úndeýin: "Osy jyldarda memleketimiz agroónerkásip keshenine júıeli túrde qoldaý kórsetýdiń tıimdi múmkindigin tapty. Qazir ol strategıalyq basymdyq retinde qarastyrylyp otyr.

Biz birlese kúsh jumyldyryp, halqymyzdyń ósip-órkendeýine septigin tıgizetin, týǵan ólkemizdiń shynaıy áleýetin kórsetetin aýyl sharýashylyǵyn jańǵyrtýdamyz.

Qazirgi zamanda joǵary tehnologıaly qýatty agroónerkásip kesheni eldiń áleýmettik-ekonomıkalyq damýynyń ólshemi bolyp sanalady.  

Biz Qazaqstanda dıqandardyń adal eńbegi barynsha baǵalanyp, aýyl sharýashylyǵy ınvestısıaǵa qolaıly, jańa jobalarǵa, jastarymyzdyń kúsh-qýatyna óris ashatyn perspektıvaly salaǵa aınalýy úshin barlyq jaǵdaıdy jasaımyz" dep qorytyndylaǵan.