Aýyl turǵyndary jumyspen qamtylatyny týraly Úkimettiń 2016 jylǵy 9 qyrkúıektegi keńeıtilgen otyrysynda Memleket basshysy tarapynan berilgen birqatar tapsyrmalardy oryndaý boıynsha oblys ákimi B.Atamqulovtyń tóraǵalyǵymen ótken keńeıtilgen aparattyq májiliste aıtyldy.
Elbasynyń kooperatıvter qurý jobasy Ońtústikte oryndalýy týraly atqarylǵan jumystar keń túrde talqylandy.
Oblys basshysy aýdandar men qalalarda kásipkerlik pen aýyl sharýashylyǵy kooperasıalaryn jappaı damytý máselesine erekshe toqtaldy. Osyǵan oraı, «Jumyspen qamtýdyń jol kartasy» aıasynda Ońtústik Qazaqstan oblysynda «Aýyl turǵyndaryn jumyspen qamtý» jobasy qolǵa alynyp otyr.
– Memleket basshysy Úkimetke oblys ákimderimen birlese eldi mekenderde kooperatıvter jelisin ulǵaıtýdy tapsyryp otyr. Bul óz kezeginde ishki naryqty jergilikti aýyl sharýashylyǵy ónimderimen qamtyp, qaıta óńdeý kásiporyndarynyń jelisin ulǵaıtpaq. Bul jumystardy Maqtaral, Qazyǵurt, Ordabasy, Tólebı, Saryaǵash aýdandarynda belsendi atqarýdy tapsyramyn, – dedi B.Atamqulov.
Sondaı-aq, kórshi oblystarda sút ónimderine degen suranystyń joǵary ekenin aıtqan oblys ákimi atalǵan óńirlermen áriptestik baılanys ornatýdy júktedi. Alǵa qoıǵan mindetterdiń barlyǵy turǵyndardy jumyspen qamtýǵa qatysty ekendigin qadap aıtty.
Aýylsharýashylyq ónimderiniń kólemin ulǵaıtýdy, eksportqa shyǵarýdy qamtamasyz etýde usaq taýar óndirýshilerdiń máselelerin keshendi sheshý úshin, QR «Aýyl sharýashylyǵy kooperatıvteri týraly» Zańyna sáıkes, oblysta kooperatıvterdi qurý belsendi júrgizilýde.
Búginde oblysta 8 myńnan asa usaq fermerlik sharýashylyq 81 aýyl sharýashylyq óndiristik kooperatıvterge birigip, jumys atqarýda. Olar damý baǵyttary boıynsha 19 birlik maqta sharýashylyǵy, 30 birlik astyq, 4 birlik sút óndirisi, 13 birlik iri jáne usaq mal sharýashylyǵy, 3 túıe sharýashylyǵy, 3 júgeri ósirý, 4 jylyjaı, 5 taǵy basqa sharýashylyqtardan quralyp otyr. Sonymen qatar, bıyl oblysta 14 mashına-traktorlyq stansıasy (MTS) quryldy. MTS-ter quramynda 108 dońǵalaqty traktorlar, 7 shynjyr tabandy traktorlar, 28 astyq oratyn,9 jem-shóp oratyn, 4 júgeri oratyn kombaındar men 186 basqa tehnıkalar bar.
