Ońtústik Qazaqstan oblysynda jazǵy dándi daqyldardy jınaý jumystary tolyǵymen aıaqtaldy. Bıyl oblys dıhandary astyq ósirýde ozyq tehnologıalardy, onyń ishinde tereń qopsytý ádisin qoldana otyryp, úlken kórsetkishterge qol jetkizdi dep habarlaıdy oblystyq ákimdiginiń baspasóz qyzmeti.
Ońtústiktiń sharýalary 214,4 myń ga jerge egilgen masaqty dándi daqyldardyń ár gektarynan 22 sentnerden, barlyǵy 470 myń tonna ónim jınady. Bul Qazaqstannyń egenmendik alǵan jyldardan bergi óńir dıhandarynyń jetken jetistigi dep bilemiz.
Máselen, Qazyǵurtta 42 myń ga jerge egilgen astyqtan gektaryna 26,5 st, Tóle bı aýdany 20,6 myń ga astyqtyń ár gektarynan 26 sentnerden ónim alsa, túlkibastyq sharýalar 24,8 myń ga alqaptan 25,2 sentnerden ónim alǵan.
Sonymen qatar, oblysta dándik júgerini orý naýqany bastalyp, 40,1 myń gektar jerge egilgen júgeriniń búginde 3,3 myń ga oryldy. Onyń gektarynan 42,4 sent, barlyǵy 13,8 myń tonna ónim jınaldy. Al 74 myń gektar jerge egilgen maqsarynyń búginde 28,7 myń ga orylyp, odan 20,1 myń tonna ónim jınalyp otyr. Aldyn-ala esep boıynsha dıqandar ár gektarynan 7 sentnerden jalpy 52 myń tonna ónim jınaýdy josparlaýda. Jalpy alǵanda oblysta osy jyly dándi daqyldardan 660 myń tonna ónim jınalady dep kútilýde.
Aıta keteıik, Ońtústik dıqandarynyń mol astyqqa kenelýine memlekettik "Agrobıznes 2020" baǵdarlamasy sep bolyp otyr. Qazaqstan Respýblıkasynda agroónerkásiptik keshendi damytý jónindegi 2013-2020 jyldarǵa arnalǵan «Agrobıznes-2020» baǵdarlamasy elimizdiń agroónerkásiptik kesheni sýbektileriniń básekege qabilettiligin arttyrýǵa jáne Qazaqstanda jalpy aýyl sharýashylyǵy salasyn damytýǵa baǵyttalǵan. Agroónerkásip keshen sýbektilerin sýbsıdıalaý esebinen aýyl sharýashylyǵyn memlekettik qoldaý kólemin 2020 jyly 4,5 ese ulǵaıtý kózdelgen. Baǵdarlamany 2013 – 2020 jyldary iske asyrýǵa respýblıkalyq jáne jergilikti búdjetterde kózdelgen jalpy shyǵystar barlyǵy 3 122,2 mıllıard teńgeni qurasa, onyń ishinde 2016 jyly – 340,7 mıllıard teńge bólinip otyr.
