«Nur Otan» partıasy Tóraǵasynyń Birinshi orynbasary Qaraǵandy oblysynda boldy, - dep habarlaıdy Qamshy.kz partıanyń baspasóz qyzmetine silteme jasap.

Sapar barysynda Muhtar Qul-Muhammed «Nurly jol» baǵdarlamasyn júzege asyrý sapasyn tekserdi, ındýstrıaldyq jáne agroónerkásiptik salalardyń damý qarqynyna baǵasyn berdi, partıa aktıvimen kezdesti, sondaı-aq, polıtehnıkalyq kolej ben E.Býketov atyndaǵy Qaraǵandy memlekettik ýnıversıtetine bardy.

Qaraǵandy oblysynda «Nur Otan» partıasy Tóraǵasynyń Birinshi orynbasary halyqty jumyspen qamtý máselesine erekshe kóńil bóldi. Ol jastarǵa Memleket basshysynyń tapsyrmasymen JOO jáne kásiptik ýchılıshege oqýǵa túse almaı qalǵan mektep túlekterin kásibı daıarlaý men jumysqa ornalastyrý boıynsha aýqymdy respýblıkalyq joba qolǵa alynǵanyn jetkizdi. Partıa elimizdiń ár óńirindegi jaǵdaıdy jiti zerttep, kómekke muqtaj 10 myńǵa jýyq jasty anyqtady. «Nur Otan» olardyń barlyǵyna qoldaý kórsetedi. Atap aıtqanda, jastardy jumysshy mamandyqtary boıynsha oqytyp, memlekettik baǵdarlamalar aıasynda turǵyzylyp jatqan nysandarǵa jiberedi.

Muhtar Qul-Muhammed ortalyq Qazaqstanǵa saparynyń sońynda E.Býketov atyndaǵy Qaraǵandy Memlekettik ýnıversıtetine bardy. JOO-nyń profesor-oqytýshylar quramymen jáne stýdentterimen kezdesý Qazaqstan Táýelsizdiginiń 25 jyldyǵyna arnaldy. Onda Muhtar Qul-Muhammed: «Reseıdiń eń úlken ýnıversıtetterinde bilim alǵan Alash qaıratkerleriniń túpki maqsaty avtonomıa arqyly táýelsiz qazaq memleketin qurý edi. Olar ózderiniń búkil ómirin osy izgi maqsatqa arnap, halqynyń bolashaǵy úshin qurban boldy. Olardyń esimderin búgingi jastar eshqashan umytpaýy kerek. Sondyqtan biz Alash avtonomıasynyń qurylǵanyna 100 jyl tolý mereıtoıyn laıyqty túrde atap ótýge mindettimiz», – dedi.