Qazaqstan ekonomıkasynyń jaǵdaıy jaqsy. Bul jaıynda Ulttyq banktiń burynǵy basshysy, qazir «Astana» halyqaralyq qarjy ortalyǵynyń basqarýshysy Qaırat Kelimbetov Bloomberg agenttigine bergen suhbatynda habarlady.

Onyń aıtýynsha, Qazaqstan munaı baǵasynyń qulaýyna áý bastan ázirlenip, úkimettiń búkil rezervterin qadaǵalaıtyn táýelsiz qor qurǵan. Qazir onda 70 mıllıard AQSH dollary saqtaýly. Buǵan qosa, monetarly saıasattaǵy ózgerister de óz áserin berdi.

Kelimbetov Qazaqstannyń jańa rejımge, ıaǵnı ınflásıalyq shekteýge kóship jatqanyn jetkizdi. Buǵan munaıdyń qunsyzdanýy, Reseı ekonomıkasynyń quldyraýy men Qytaı ekonomıkasynyń baıaýlap ketýi túrtki boldy dep túsindirdi. Osynyń arqasynda Qazaq eli bul qıynshylyqtardan aman-esen ótti, - dedi.

Sondaı-aq, ol ınflásıanyń jyl sońyna qaraı 10 paıyzdan tómen túsetinine senim bildirdi. Onyń paıymdaýynsha, bul kórsetkish qazirgi qıyn-qystaý zamanda jaman emes. Sonymen qatar Qaırat Kelimbetov munaı óńdeýge qatysty josparmen de bólisti.

"Biz qazir táýligine munaıdyń 1,7 mıllıon barrelin óndirip, álemdegi munaı óńdeıtin TOP-20 elderdiń qataryna enemiz. Bizde Qashaǵan men Teńgiz sıaqty alpaýyt ken oryndary bar. Exxonmobile ı Shevron kompanıalary bizben árimen qaraı da jumys isteýge múddeli. Sondyqtan biz munaı óndirýdi eki ese ulǵaıtyp, 3 mıllıonǵa deıin jetkizbekshimiz. Artynsha álemniń «úzdik jetiligine» kiretin oıymyz bar", - dedi  «Astana» halyqaralyq qarjy ortalyǵynyń basqarýshysy Qaırat Kelimbetov.