Astana qalasyndaǵy transfýzıologıa ǵylymı-óndiristik ortalyǵyndaǵy HLA-zerthanasynyń mamandary álemge belgisiz qazaq ultyna ǵana tán antıgendi tapqan. Qazaq popýlásıasynyń jańa tuqymy halyqaralyq derekter qorynda tirkeldi, dep habarlaıdy Qamshy.kz  Baq.kz saıtyny silteme jasap.

«Zerthanada donor men resıpıenttiń qanyn zertteý arqyly olardyń sáıkestigin tekseremiz. Osyndaı tekserý barysynda qazaq pasıentiniń qanynan jańa leıkosetarlyq genniń túrin anyqtadyq. Bul álemdegi bizdiń ashqan jańalyǵymyz boldy. Dúnıejúzinde esh jerde tabylmaǵan gen Qazaqstanda tabylyp jatyr», - dep málimdedi transfýzıologıa ǵylymı-óndiristik ortalyǵynyń tinderdi ımmýnologıalyq tıpteý zerthanasynyń meńgerýshisi Aıda Turǵanbekova.

Mamannyń sózinshe, álemde qazaqtardyń qanyna eshkim osyndaı zertteý júrgizgen emes.

«Bizdiń ózimizge tán jańa antıgen tabylyp jatyr. Sebebi eshkim qazaqtyń leıkosetarlyq antıgenin zerttegen joq. Biz birinshi bolyp osyny qolǵa aldyq. Sondyqtan osyndaı jańa genderdiń anyqtalýy áli de jalǵasady dep oılaımyn», - deıdi transfýzıolog.

Jalpy, qazirgi tańda álemde 150 mıllıonǵa jýyq antıgen anyqtalǵan eken. Qazaqtan tabylǵan antıgen Germanıaǵa jiberilip, oǵan «DQB1*03:82» ataýy berildi. Osylaısha, qazaq popýlásıasynyń jańa tuqymy halyqaralyq derekter qorynda tirkeldi.
Bizdiń mamandardyń aıtýynsha, bul ádettegi antıgen jáne eshqandaı aýrýǵa áser etpeıdi. Biraq transplantasıa kezinde ony muqıat zertteý kerek.

«Leıkosıtterde arnaıy antıgen bolady, ol adam múshelerin aýystyrǵan kezde ony qabyldamaýy múmkin. Sondyqtan osyndaı jaǵdaı bolmaýy úshin donor men resıpıenttiń osy genderiniń sáıkestigin qaraımyz. Sonda ǵana transplantasıa júrgiziledi», - deıdi zerthana meńgerýshisi.

Aıta keteıik, Astana qalasyndaǵy transfýzıologıa ǵylymı-óndiristik ortalyǵyndaǵy HLA-zerthanasy 2011 jyly ashylǵan. Bul zerthanasyz organdardy transplantasıalaý múmkin emes. 2011-2015 jyldar aralyǵynda 536 operasıa jasalǵan.