19 qazan kúni Halyqaralyq ǵarysh stansıasyna ushyrylatyn «Soıýz MS-02» transport kemesi bar «Soıýz-FG» zymyrany Baıqońyrdyń ushý alańyna ornatyldy, - dep habarlaıdy Qamshy.kz QazAqparatqa silteme jasap.

«On altynshy qazan kúni «Soıýz MS-02» kóliktik basqarylatyn kemesimen birge «Soıýz-FG» tasyǵysh-zymyrany Baıqońyr aılaǵynyń №31 ushý alańyna shyǵaryldy jáne ushyrý qondyrǵysyna ornatyldy», - delingen habarlamada.

Reseı zymyran-ǵarysh salasyndaǵy kásiporyndardyń aldyńǵy toptary radıojúıeler jumysyn tekserý, sandyq aqparat aýqymyn testilik quraý jáne ekıpajdy avtomatty qutqarý júıesin testileý syndy jumystarǵa kirisip ketti. 17 qazan kúni ǵarysh zymyrany tolyq synaqtan ótkiziledi, 18 qazan kúni halyqaralyq ǵarysh stansıasyna 49/50 ekspedısıa ekıpajynyń negizgi quramyn bekitiletin memlekettik komısıanyń otyrysy ótedi, dep habarlady RIA Novostı.

Buǵan deıin «Soıýz MS-02» (№732) basqarylatyn kemesiniń tehnıkalyq aqaýlaryn jóndeý jumystary týraly materıaldardy memlekettik komısıanyń qaraǵany jáne HǴS ushyrý merzimin 19 qazanǵa, Máskeý ýaqytymen 11:05-ke belgilegeni habarlanǵan edi. Keme ekıpajynyń negizgi quramynda Roskosmos ǵaryshkerleri Sergeı Ryjıkov pen Andreı Borısenko jáne NASA astronavty Robert Sheın Kımbroý bar. Dýblórler - reseılik ǵaryshkerler Aleksandr Mısýrkın men Nıkolaı Tıhonov jáne NASA astronavty Mark Vande Haı.