Qaztalov aýdanyndaǵy Qaraózenge Jaıyq-Kóshim júıesinen baseınaralyq sýdy jiberý úshin Kırov-SHejin arnasyn qaıta jańǵyrtý jumystary júrgizilýde, dep habarlaıdy Qamshy.kz Qazaqparat saıtyna silteme jasap.

Oblys ákimi Altaı Kólginovtiń aıtýynsha, aýyl sharýashylyǵynyń tıimdi damýy ırrıgasıalyq júıemen tikeleı baılanysty. Memleket basshysy N.Á.Nazarbaev ırrıgasıalyq júıeni jańǵyrtý jáne jaıylymdyq jerlerdi sýlandyrý máselesine udaıy kóńil bólýde. Osyǵan oraı qolǵa alynǵan atalmysh jobanyń maqsaty - Reseıden alynatyn Edildiń 30 mln. tekshe metr sýyna táýeldilikti azaıtý. Joba júzege asqanda, oblystyń ońtústik aýdandaryndaǵy 6 myń gektar kóltabandaryn sýarý júıesi jańǵyrtylady. Bul 130 myń gektar jerdi sýarmaly etýge múmkindik beredi. Sol aýmaqta ornalasqan Qaztalov jáne Jańaqala aýdandarynyń eldi mekenderi Kırov-SHejin arnasynyń tazartqysh qondyrǵylary arqyly aýyz sýdy da paıdalanatyn bolady.

Bıyl Kırov-SHejin arnasyn jańǵyrtýdyń birinshi kezeńi (55 shaqyrym) márege jetti. Endi qarasha aıynyń basynda ekinshi kezeńi (75 shaqyrym) aıaqtalmaq. Jobany tolyq júzege asyrý úshin úshinshi kezeńniń (49 shaqyrym, onyń 18,8 shaqyrymy - jańa arna qurylysy) jobalyq-smetalyq qujattamasy jyl sońyna deıin daıyn bolmaq. Úshinshi kezeń qarjysyn aldaǵy jyldyń búdjetine engizý baǵytynda jumystar atqarylýda. Buǵan el Úkimeti men tıisti mınıstrlikter tarapynan qoldaý kórsetilýde.

Bıyl sonymen qatar Aqjaıyq, Jańaqala, Jánibek, Terekti aýdandarynyń 66 sý sharýashylyǵy nysandarynyń qujattaryn jáne 3 sý sharýashylyǵy nysanynyń jobalyq-smetalyq qujattamasyn jasaýǵa 106 mln. teńge bólindi. Oǵan qosa Syrym aýdany Sholaq Ańqaty sý qoımasyn qalpyna keltirý (5,6 mln. teńge), Óleńti kóltabandy sýarý júıesin jańǵyrtý (18 mln. teńge) jumystary bastaldy. Terekti aýdany Jaıyq-SHalqar sýlandyrý arnasy sorǵy stansasynyń jobalyq-smetalyq qujattamasy ázirlendi, bul baǵyttaǵy jumystar kelesi jyly qolǵa alynbaq.

«Osynyń bári aýyl sharýashylyǵy taýaryn óndirýshilerine qolaıly jaǵdaı jasap, mal sharýashylyǵynyń odan ári órkendeýine septigin tıgizedi», - dedi Altaı Kólginov.