Jas ánshilerden quralǵan Ninety One toby búginde el aýzyndaǵy negizgi taqyryptardyń biri. Atalǵan toptyń sán úlgisi men sahnadaǵy ónerine narazy azamattar eldiń ár túkpirinen shyǵyp jatyr. Ninety One-nyń erteń Jezqazǵan qalasynda ótýi tıis konsertine de ruqsat berilmepti, - dep habarlaıdy Qamshy.kz.

19 qazan kúni Jezqazǵan qalasynyń Mádenıet jáne halyqtar dostyǵy úıinde Ninety One tobynyń konserti ótýi kerek bolǵan. Alaıda, qala ákimdigine turǵyndar atynan atalǵan konserttiń ótýine tyıym salý týraly 350 adam qol qoıǵan hat joldanǵan. Hat avtorlary toptyń ustanymdary bala tárbıesine keri áserin tıgizetinin aıtqan.  

Ákimdik turǵyndardyń ótinishin qanaǵattandyryp, top konsertin ótkizýge ruqsat bermegen.

«Halyq qarsy bolyp, júzden asa adam hat joldady. Qala turǵyndarynyń ótinishimen sanasyp, atalǵan toptyń erteńgi konsertin ótkizýge ruqsat berilmedi», - deıdi Jezqazǵan qalasy ákiminiń baspasóz hatshysy Gúlden Jandıldınova.

Ákimdik ókili konsertke aldyn-ala bılet alǵan turǵyndardyń aqshalary qaıtarylyp jatqanyn da jetkizdi. 

Esterińizge salsaq, buǵan deıin Ninety One tobyna qarsy Shymkent, Aqtóbe, Qaraǵandy qalalarynda da narazylyq sharalary ótken bolatyn.