Elimizdiń ońtústiginde qaterli isikten «Znahar» atty qońyzdy tirideı jutý arqyly emdeletinder kóbeıgen, dep habarlaıdy Qamshy.kz Baq.kz saıtyna silteme jasap.  

Jurt aýzynda «Qytaıdan ákelinedi eken» delinetin bul qońyz Qazaqstannyń da ár qalasynan tabylady. El ishinde ol jaıly: «Sýǵa qosyp, tirideı jutsa, 70 túrli aýrýǵa em bolady. Tipti qaterli isik (rak) kletkalaryn da joıyp jiberedi», – degen áńgime bar. Bite sıaqty bul maıda «jybyrlaýyqtardyń» kishkentaı qorapshasy 8 myń teńgeden satylyp jatqanyn da estımiz. Al osy qońyzdyń qaterli isikke em bolatyny ras pa? Bul jaıly mamandar ne deıdi? 

Jándik jutqandar ne deıdi?

«Znahardy» áleýmettik jeli arqyly saýdalaýshylar: «Bul qońyzdyń qadirin Qytaı, Mysyr, Kolýmbıa, Latyn Amerıkasy jaqsy biledi. Argentınalyqtar ony 1991 jyldan beri qoldanady. Onymen 70-ke jýyq aýrýdy emdeýge bolady. Muny medısına mamandary da moıyndap otyr. Álemde áli emi tabylmaǵan Parkınson, Daýn, SPID, qant dıabeti, rak, psorıaz aýrýlarynan qulan-taza jazylyp ketken adamdar bar. Staqandaǵy sýǵa salyp ishse boldy, 10-15 kúnde-aq nátıjesi bilinedi.

«Znahar» qońyzyn sýǵa salyp, tiri­deı jutý kerek. Asqazanǵa túsken soń ol ózinen bıologıalyq belsendi zattar bóledi. Onyń qabyǵyndaǵy hıtozan qan túıirshikterin jańartady. Sol arqyly ımýnıtetti kóteredi, aǵzany jasartady. Barlyq zıandy qaldyqtardy jo­ıyp, árbir kletkany, jasýshany jandandyryp, anadan jańa týǵandaı etedi. Ózi ishek arqyly syrtqa shyǵyp ketedi», – deıdi.

Olardyń aıtýynsha, bir staqan sýǵa álgi jándiktiń bir danasyn salyp, ony sýmen qosa tirideı jutyp jiberý kerek eken. Osylaı ár kúni bireýge kóbeıte otyryp, 70 danaǵa jetkizse, adam aýrý ataýlyny umytatyn kórinedi. Satýshylar osylaı maqtaýyn kelistir­genmen, tap osy qońyzdyń arqasynda qulan-taza jazylyp kettim degen adam joq. Al on eki kúnde 78 qońyz jutyp kórgen tarazdyq Aıdarbek Rymǵalıev bylaı deıdi:

«Óskemende mıynda isigi bar áskerı jigit 10 kún boıy 70 danadan jutyp júrip, jazylyp ketipti degendi estigen soń áriptesim bir qorabyn alypty. Banan, almanyń qabyǵy, nan qoqymyn tastap qoısa ózi jep, ózi kóbeıe beredi eken. Jartysyn maǵan berdi. Sýǵa salyp, kún saıyn bireýge kóbeıtip, on eki kún ishtim, basymnyń aýyrǵany da, belimniń syzdaıtyny da, tizemniń qaqsaıtyny da basylǵan joq. Qan qysymym jıi kóte­riletin, oǵan da áser etpedi. Ne paıdasyn, ne keri áserin sezinbedim. Áriptesim de solaı degen soń tastaı saldyq».

Dárigerlerden mardymdy jaýap joq

Osyndaı oıdy on shaqty adamnan estigen soń dárigerlerdiń pikirin bilgimiz kelgen. Adam aǵzasy – parazıtterdiń tirshilik etýine qolaıly orta. Sondyqtan qanda, baýyrda, ótte, ókpede, ishekte, tipti teri astynda túrli qurttar tirshilik ete alady jáne olar aýrý týdyrýǵa qabiletti. Keremet em dep satylyp jatqan «Znahar» da aǵzada tirshiligin jalǵastyryp, kóbeıýi múmkin be? Bul qońyzdyń densaýlyqqa zıany joq pa? Em ekeni ras pa? Bul suraqtardy biz gastroenterolog, terapevt, endokrınolog dári­ger­lerge qoıǵan edik.

Suraqtyń tórkinin túsin­gennen olar bul jaıynda eshteńe bilmeıtinin, estime­genin aıtty. Onkolog-dáriger bolsa: «Estip júrmin, biraq eshqandaı pikir aıta almaımyn. Bul suraqqa ja­ýap bermeı-aq qoıaıynshy, dıplomym men sertıfıkatymnan aıyrylatyn ja­ıym joq. Qalasa ishsin, qalamaǵandardy eshkim qınamaıdy», – dep basyn ala qashty.

Mamandar máselege syn kózben qaraıdy

Osyndaı zert­teýdi «Komsomolskaıa pravda» gazetiniń tilshileri de júrgizgen eken. Reseılik ǵalymdar mundaı qońyzdyń emdik qasıetine kúmán keltiripti.

«Men muny oıdan shyǵarylǵan ańyz arqyly bireýdiń qaıǵysyn aqshaǵa aınaldyratyn alaıaqtyq dep sanaımyn. Zertteýden ótpegen, emdik qasıeti anyqtalmaǵan, qandaı da bir tekserýden ótpegen qońyz qaterli dertterden qulan-taza qutqardy deýge sený qıyn», – depti ımmýnologıa profesory Iýrıı Smolkın.

Semen Kýstov degen bıologıa ǵy­lymdarynyń kandıdaty: «Jurttyń «Znahar» dep áspettep júrgeni kádimgi qaratús qońyz (chernotelka). Eýropada onyń 150 túri bar. Onyń tıtteı bolsa da emdik qasıeti bar degen qaýesetke sený – nadandyq. Odan bóli­netin fermentter asqazan sólimen aralasqanda túgel joıylyp ketedi, qaıta aǵzadaǵy aqýyzdy ydyratady. Qanaty men aıaqtary qat­ty, sondyqtan óńesh pen asqazannyń názik te juqa qa­byǵyn zaqymdaýy múmkin. Jurt ony japa-tarmaǵaı satyp alyp jatqanyn kórgende kádimgideı kóńilim qulazıdy», – degen.

«Ony teriteser dep te ataıdy. Odan bólinetin aqýyz adam aǵzasyna jat, ol asqazannyń shyryshty qabatyn kúıdiredi. Endi bir sátte on nemese odan da kóp qońyz jutqan adamnyń asqazanynda ne bolatynyn elestetip kóri­ńizshi! Onyń zardaby munymen toqtamaıdy, basqa organdardy da búl­diredi. Al alergıa, astmasy bar adamdar úshin ol tipti de qaýipti, ólimge dýshar etýi múmkin. Qazir ol qaterli isikke shaldyqqan adamdar úshin jalǵyz qutqarýshy retinde nasıhattalyp jatyr. Osy jerdegi saýatty qýlyqqa nazar aýdaryńyz: naýqastyń dıagnozy onsyz da máz emes, medısınalyq kitapshasynda qońyz jegeni jazylmaıdy. Iaǵnı jan­tásilim etse aýrýdyń asqynýynan, zardabynan dep kórsetiledi. Al ajal aýrýdan emes, teriteser saldarynan bolǵanyn eshkim anyqtamaıdy da, dáleldeı de almaıdy.

Shyǵys medısınasynda teriteserdi keıbir dári quramyna qosatyny ras. Onda da 150 túriniń tek bireýi ǵana kep­ti­rilip, untaqtalǵan, óte az mólsherde ǵana. Qońyzdyń qaterli isik­ten bas­tap 70 túrli aýrýǵa em ekeni ras bolsa, qurt-qumyr­s­qany pisirip te, shıkileı de jep júrgen qytaılyqtar nege bul aýrýmen aýyrady? Bul «jańalyqty» kim shyǵaryp júrgeni belgisiz jáne mundaıǵa sený kúlkili», – deıdi Shyǵys medısınasy ortalyǵynyń bas mamany, refleksoterapevt Raısa Chepelkına.

...Mine, búginde jarnamasy men saýdasy dúrildep turǵan «Znahar» qońyzy týraly mamandar pikiri osyndaı. Degenmen ony qınalǵan janyna dárý izdegender tyńdaı qoıar ma eken? Al biz ázirge bul jándikti dertke daýa nemese aǵzaǵa zıandy dep te aıta almaımyz. Biraq osy maqalany oqyǵandar ózderi­ne qajetti oı túıedi dep senemiz.