Baıan Maqsatqyzy ózin óltirmek boldy dep aıyptalyp otyrǵan burynǵy kúıeýi Baqytbek Esentaevty tolyqtaı keshirdi. Bul týraly Taldyqorǵanda ótken sot otyrysynan keıin bergen suhbatynda Baıannyń qorǵaýshysy Marat Asqarbekov málim etti, - dep habarlaıdy Qamshy.kz QazAqparatqa saıtyna silteme jasap.

Aıta keteıik, advokat Marat Asqarbekov - Baqytbek Esentaevtyń týǵan bajasy, ıaǵnı Baıannyń ápkesi Bátestiń jubaıy, tanymal aktrısa, ánshi Asha Mataıdyń ákesi.

Esterińizge salsaq, Almaty oblysynyń qylmystyq ister jónindegi mamandandyrylǵan aýdanaralyq sotynda Baqytbek Esentaevqa qatysty sot prosesi keshe, 18 qazan kúni bastalyp, búgin jalǵasyn tapty. İsti qaraý jabyq rejimde ótip jatyr. Ony Almaty oblysynyń qylmystyq ister jónindegi mamandandyrylǵan aýdanaralyq sotynyń tóraǵasy Baıjúnisov Berikjan Ábenuly júrgizýde.

B.Esentaevqa QR QK-niń 24-baby 3-bólimi, 99-babynyń 2-bólimi 10-tarmaǵy (zorlaýmen nemese seksýaldyq sıpattaǵy zorlyq-zombylyq áreketterimen ushtasqan adam óltirýge oqtalý) 120-babynyń 1-bólimi (zorlaý) 121-babynyń 1-bólimi (seksýaldyq sıpattaǵy zorlyq-zombylyq áreketteri) boıynsha aıyp taǵylǵan.

Belgili prodúser, eki balanyń anasy Baıan Maqsatqyzy maýsymnyń 10 kúni birneshe jerden pyshaqtalyp, aýyr jaraqatpen Talǵar aýdanyndaǵy aýrýhanaǵa túsken bolatyn. Ony óltirmek boldy degen kúdikpen óziniń kúıeýi Baqytbek Esentaev ustalyp, qamaýǵa alyndy. Qazirgi tańda Baıan burynǵy tegine qaıta oralǵan syńaıly. Ol áleýmettik jelidegi paraqshalaryna Baıan Maqsatqyzy degen ózgeris engizgen.

Buǵan deıin Baıan Maqsatqyzynyń alǵash ret sot otyrysyna qatysqany habarlanǵan bolatyn.