Búgin №2 Atyraý qalalyq sotynda Maks Boqaev pen Talǵat Aıan isi boıynsha sot otyrysy ótip, onda mańyzdy kýágerlerden jaýap alynýy tıis bolatyn. Otyrys barysynda týǵan keleńsizdik saldarynan sot otyrysy tústen keıin jalǵasatyn boldy, - dep habarlaıdy Qamshy.kz.

Tańerteń sot otyrysyna aıyptalýshylardan Talǵat Aıan ǵana kelgen bolatyn. Al Maks Boqaev densaýlyǵyna baılanysty otyrysqa qatyspaımyn dep ótinish jazǵan. Osyǵan baılanysty M.Boqaevtyń qorǵaýshylary ony uryp-soǵýy múmkin, sondyqtan aıyptalýshyǵa bilikti medısınalyq kómek kórsetilýi kerek dedi. Alaıda, sotqa tóraǵalyq etip otyrǵan G.Dáýleshova M. Boqaev osylaısha sotqa qurmetsizdik kórsetti dep sot otyrysyn ótkize beretinin jetkizdi.

Sondaı-aq, T. Aıan túnde tergeý ızolátorynda qolynyń tamyryn kesýge árekettengeni habarlandy. Sot otyrysynda sýdıa G. Dáýleshova aıyptalýshynyń densaýlyǵynan úlken kinárat tabylǵan joq dep, sáıkes medısınalyq anyqtamany oqyp bergen. Anyqtamaǵa sáıkes, Talǵat Aıannyń eki qolynyń shyntaq tustary syrylyp, zaqym kelgen. Talǵattyń advokaty ári ákesi Tólepqalı Aıanov bul oqıǵa týraly tergeý ızolátoryna ekinshi aıyptalýshy Maks Boqaevtyń densaýlyq jaǵdaıyn bilýge barǵanda kezdeısoq bilgenin aıtady. 

Aıyptalýshylar M. Boqaev pen T. Aıan jáne olardyń qorǵaýshylary «Tóleshovtiń T. Aıanǵa aqsha bergenin rastaıtyn» kýágerlerdiń beınebaılanys arqyly emes, Atyraýǵa kelip, sot zalynda kýálik berýin talap etýde.

Eske sala ketsek, 2016 jyldyń sáýir aıynda Atyraýda ótken jer mıtıńisine baılanysty aıyptalǵan T.Aıan men M. Boqaevtyń isi sotta qaralýda. M.Boqaev pen T.Aıanǵa QR Qylmystyq kodeksiniń úsh (174, 274-b, 4-tarmaq, 400-b.) baby boıynsha aıyptar taǵylýda.

Buǵan deıin beınekonferensıa arqyly shymkenttik kásipker T. Tóleshov sotta kýálik bergen bolatyn.