Saparbaevtyń soty bastaldy. Aqtóbe oblysynyń ákimi óz quqyn Astana sotynda qorǵap jatyr dep habarlaıdy Qamshy.kz 31 arnaǵa silteme jasap.
Berdibek Máshbekuly ózine dálelsiz jala jaýyp, ar-namysyma nuqsan keltirdi dep azamattyq belsendiniń ústinen shaǵymdanǵan bolatyn. Jer satý máselesine qatysty aıtylǵan málimdemeniń qaı sózi sheneýniktiń shamyna tıdi? Jáne moraldyq shyǵyn esebinde qansha ótemaqy surap otyr? Bul suraqtarǵa Saparbaev myrzanyń ózinen jaýap alý múmkin bolmady. Óıtkeni, aımaq basshysynyń ornyna zańdy ókili kelipti.
Bir ǵana Shyǵys Qazaqstan oblysy Úrjar aýdanyna qarasty jalpy kólemi, aýyl sharýashylyǵy maqsatynda paıdalanatyn 87 myń 437 gektar jerdi 2010 jyldary, sol kezde oblys basshysy bolǵan Berdibek Máshbekuly Saparbaevtyń tikeleı tapsyrmasymen Qytaı azamattarynyń ınvestısıa salý maqsatynda alyp alǵany anyqtaldy.
Máseleniń bári Aıdyn Egeýbaevtyń ınternet arqyly jarıalaǵan osy málimdemesinen bastalyp otyr. Artynsha "jerdi sheteldikke berip jiberdi" delingen Saparbaev myrza ózine jala japty dep sotqa shaǵymdanǵan edi. Búgin bastalǵan sot otyrysyna sheneýniktiń ózi emes, advokaty keldi. Aıtqan sózi úshin aıypty bolǵandar óz pikirin dáleldeýge baryn saldy.
"Qytaı azamattarynyń 2011 jyly 7 tamyzda Úrjar aýdanynda TJM tikushaǵymen egistik alqaptaryna kelgeni mańyzdy aqparat dep oılaımyn", - deıdi azamattyq belsendi Aıdyn Egeýbaev.
"Egeýbaev Aıdyn ol jerde tikeleı Berdibek Saparbaevtyń tapsyrmasy bolǵany anyqtaldy dep kórsetken. Alaıda, bul jerde qytaılar tikushaqpen usha ma, ushaqpen usha ma, qaı jerge barady, oǵan Berdibek Máshpekuly Saparbaevtyń tikeleı eshqandaı qatysy joq dep sanaımyn", - deıdi Berdibek Saparbaevtyń ókili Saǵadat Ámire.
Saparbaev myrzanyń ókili kórgisi kelmegen vıdeo mynaý bolatyn. Tótenshe jaǵdaı qyzmetiniń tikushaǵynan túsip, jer týraly baıandamany tyńdap turǵandar - qytaılyq kompanıanyń ókilderi eken. Osy daýǵa sebepker bolǵan myńdaǵan gektar jerdiń zańdy ıesi – "Bátýa" jaýapkershiligi seriktestiginiń quryltaıshylary mundaı kezdesýdiń bolǵanyn rastap otyr. Tek, bul áriptestikke aımaq basshylarynyń yqpaly bolmady deıdi.
"Saparbaevtyń qatysy joq. Birinshiden. Ekinshiden "Dári-med" pen "Ýeız-grýpp" ekeýiniń birikkeni, óıtkeni sońynan qurylǵan "Bátýa" kompanıasyna "Ýeız-grýpp" kompanıasy Qytaıdan bank nesıelerin "Bátýaǵa" qamtamasyz etýge sharalar jasady", - dedi kýáger Nurlan Bıádilov.
Demek, qytaılyq zańdy tulǵalardyń úlesi bar kompanıanyń jerdi jalǵa alǵany rastaldy. Talapkerler, sol kezdegi zańnamada oǵan tyıym salynbaǵanyn alǵa tartyp otyr.
Jaýap berýshi tarap jer kodeksiniń myna tarmaǵyn negizge alyp otyr. Oblys ákimderiniń quzyretin belgileıtin qujatta, jerdi satý jáne jaldaý sharttaryn baqylaýdy júzege asyrady delingen. Alaıda, Saparbaev myrzanyń shamyna tıgeni basqa eken.
"Másele quzyreti sheginde bolyp turǵan joq qoı. "Tikeleı tapsyrmada" bolyp tur ǵoı másele. "Tikeleı tapsyrmany" dáleldesin. Boldy. Basqa suraǵym joq", - dedi Saǵadat Ámire.
Aıta keterligi, Aqtóbe oblysynyń ákimi moraldyq ótemaqy retinde 5 mıllıon teńge suraǵan eken. Sheneýnik bul qarjyny balalar úıine aýdarmaqshy.
