Almatyda 27 jastaǵy áıel óziniń 9 jasar qyzyn uzaq ýaqyt boıy sabap kelgen.
Bul týraly Qamshy.kz 24.kz arnasyna silteme jasap habarlaıdy. Óz balasyn uryp-soqqan tas baýyr ana ýaqytsha oqshaýlaý abaqtysyna qamaldy. İsi sotta qaralyp, ata-ana quqyǵynan aıyrylýy múmkin. 9 jasar búldirshinniń bet-álpeti kógerip júretinin áýeli ustazdary baıqaǵan. Sheshesiniń ońdyrmaı uratynyn kórshileri de rastap otyr.
Jalǵyz basty áıelge analyq boryshyn durys atqarmaǵany úshin buǵan deıin birneshe ret eskertý jasalǵan. Tipti ákimshilik jaýapkershilikke de tartylypty. Biraq ol qyzyn urǵanyn toqtatpaǵan. Sondyqtan tıisti sheshim qabyldanyp, ýaqytsha oqshaýlaý abaqtysyna qamaldy. Saltanat Ázirbek, Almaty qalalyq İİD resmı ókili: - Qylmystyq is QK 140-babynyń normalary boıynsha qozǵalǵan bolatyn. Iaǵnı osy azamatshanyń jasaǵan is-áreketi qylmys bolyp tabylady. Tıisti saraptamalardy taǵaıyndadyq. Sonyń ishinde sot-medısınalyq saraptama da bar.
Qazir 4-synypta oqıtyn qyz Balalarǵa jedel járdem berý ortalyǵynda emdelip jatyr. Qýanarlyǵy, búldirshindi anasynyń týǵan-týystary óz qamqorlyǵyna alýǵa kelisip otyr. Marat Qaptaǵaev, Balalarǵa jedel járdem berý ortalyǵy bas dárigeriniń orynbasary: - Qulaǵynda, aıaqtarynda qan uıyǵan jerleri bar. Kógergen jerleri bar. Basynyń mıy shaıqalǵan. Qazirgi baqylaý barysynda jalpy jaǵdaıy jaman emes, durystalyp kele jatyr.
Bala óz esinde. Balany uryp, tárbıeleýge bola ma? Psıhologtar buǵan úzildi-kesildi qarsy. Psıhologıa ǵylymdarynyń doktory, profesor Raýshan Kárimova otbasylyq agresıa balanyń bolashaǵyna balta shabýy ábden múmkin deıdi. Raýshan Kárimova, Psıhologıa ǵylymdarynyń doktory, profesor: - Jan jaraqaty óte aýyr. Ony emdeý úshin uzaq ýaqyt qajet. Otbasynda zorlyq-zombylyq kórip, psıhıkasy buzylǵan balalardy emdeýdiń bir joly – olarǵa kóbirek meıirim shýaǵyn tógý. Ata-ana men bala arasyndaǵy ózara senimdi qalpyna keltirý kerek. Ómirdiń keıbir sátsizdikteri úshin baladan ósh alýdyń qajeti joq. Qalalyq Iývenaldi polısıa bóliminiń basshysy Leıla Álipbaevanyń aıtýynsha, jyl basynan beri Almatyda 29 ata-ana ata-ana quqyǵynan aıyrylǵan.
Taǵy 115 ata-ana ul-qyzdaryna durys tárbıe bermegeni úshin ákimshilik jaýapkershilikke tartyldy. Janna Tasırova, Qalalyq bilim basqarmasy qorǵanshylyq jáne qamqorshylyq bóliminiń basshysy: - Araǵyn tastap, narkotıkalyq zattardy qoldanbaı, uryp–soǵýdy doǵaramyn dep óz-ózin túzeıtin bolsa, onda alty aı kóleminde qaıtadan sotqa shaǵymdanyp ótinish berip, ata-ana quqyǵyn qaıtadan qaıta qaıtarýyn suraıdy. Bala – ómirdiń sáni, otbasynyń shattyǵy. Al balanyń baqytty bolýy anasynyń mahabbaty men ákesiniń meıirimine baılanysty.
