Ómir ótedi de ketedi. Onyń ár sátin qadirleı bilý kerek. Ómir jolyn endi ǵana bastaǵan Aıgúl Qusaıynovanyń óler aldyndaǵy haty osy sózimizdi rastap turǵandaı. 

Oqýyn bitirip, mektepke muǵalim bolyp ornalasqan Aıgúldiń hatyn «Qostanaı jańalyqtary» basylymy jarıalapty. 

«Sálem, meniń aty-jónim Aıgúl Qusaıynov. Jasym 22-de.  Mektepte jaqsy oqydym. Joǵary oqý ornyn qyzyl dıplomǵa bitirdim. Oqýdy aıaqtaǵannan keıin Rýdnyı qalasyndaǵy mekteptiń birine muǵalim bolyp ornalastym. Sabaq beremin. Biraq, oqý-oqý dep shapqylap júrip densaýlyǵymdy qurtyp aldym. Durys tamaqtanǵam joq. Bári sodan bastaldy. Anyǵynda, basty baılyq osy densaýlyq eken.

Aýrýdyń alǵashqy belgileri jumysqa turǵannan sátten-aq belgi berdi. Kózim tumandanyp, basym aınalatyn. Sóılep turǵanda daýsym ózgerip ketetin. Keıin dárigerlerge baryp maǵan dıagnoz qoıdy. Qalqansha bezimnen problema paıda boldy. Emdik dárilerdi qabyldap júrdim. Biraq, áseri bolǵan joq. Uıyqtaı almaıtynmyn. Ýaqyt óte júrip-turýdan qaldym. Tipti sóıleýge de shamam kelmedi. Oıymdy qaǵazǵa jazyp jetkizetin boldym». 

Oǵan tıisti em alýǵa meken-jaı qujatynyń joqtyǵy kedergi bolypty. Osy sebepti Rýdnyı qalasynyń dárigerleri ony qabyldamaı qoıǵan. 

«Ol ýaqytta men júrip-tura almaıtynmyn. Al dárigerler meni bir kabınetten ekinshi kabınetke sandaltty. Men bir qasyq sýdy jutýǵa qınalamyn, al olar maǵan dári jazyp berdi».

Aýrýy asqynǵan Aıgúldi jaqyndary Rýdnyıdan 250 shaqyrym jerdegi Jetiqara aýdanynyń aýrýhanasyna jatqyzady.

«Aýrýym kún ótken saıyn dendeı tústi. Janym qınaldy. Keı kezderi meniń ahýalymdy baqylap júrgen dárigerlerden máńgilik uıqyǵa jiberetin ekpe salýdy ótinetinmin…». 

Óz kezeginde dárigerler Aıgúldi «bar ómiriń alda, qaıǵyrma» dep sabyrǵa shaqyrǵan. 

«Baqyt degen seniń júrip-turyp, iship-jep, tynys alǵanyń eken ǵoı. Soǵan da táýbe deý kerek. Odan artyqtyń keregi joq. Baqyt degen janyńda áke-shesheńniń, jaqyn baýyrlaryńnyń bolǵany eken. Tek solar ǵana sen qınalǵan kezde kómek qolyn sozady. Qazir ǵana qolyńda bar dúnıeni baǵalaı bilý kerektigin túsinip otyrmyn. Tek jaqsylyqqa sený kerek. Jaqsylyq jasaý kerek. Meniń ómir súrgim keledi. Ómir súrerime senemin» dep jazǵan eken Aıgúl óz hatynda. 

Alaıda ajal aqyry ony alyp tyndy. Aıgúldiń hatyn jarıalaýǵa onyń apaıy Nurgúl Qusaıynova ruqsat beripti.