Baıan Esentaeva kúıeýimen arada bolyp jatqan oqıǵalarǵa qaramastan, óziniń tegin ózgertpeıtindigin aıtyp ótti. Munymen qatar, ol joldasymen sóılesip, dos bolyp qalý týraly sheshim qabyldaǵan eken.

Bul týraly ol bloger Elvıra Erǵalıevaǵa bergen suhbatynda aıtqan.

Blogerdiń ınstagram paraqshasynda Baıan Maqsatqyzymen bolǵan vıdeosuhbat jarıalandy. “Baıan Maqsatqyzy, joq, Baıan Esentaeva kúıeýin keshirip, áıelderdiń quqyǵyn qorǵaıtyn uıym ashý týraly ıdeıasyn umytyp ketken joq. Áli qolǵa alady. Aıtpaqshy, Baıan hanym famılıasyn aýystyrmaıdy, “Esentaı prodakshn” da atyn aýystyrmaıdy”, – dep jazdy Erǵalıeva óz paraqshasyna.

Budan ózge Baıan Maqsatqyzy kúıeýin keshirýdiń ózine qıynǵa soqqanyn aıtyp ótti. Muny birinshi kezekte balalary úshin jasaǵanyn da jasyrmady. “Onyń abaqtyda otyrǵanyna tórt aı boldy. Menińshe, túrmede bir kún otyrýdyń ózi qıyn”, – deıdi ol. Baıan hanymnyń bul sheshimin estigen jurt shýlaǵan-dy. Dese de, prodúser qandaı jaǵdaı bolsa da, óziniń sheshimin ózgertpeıtinin aıtyp ótti.

“Mennen úlgi alǵandy eshqashan qalamaıtynmyn. Men qarapaıym adammyn. Mundaı sheshim qabyldap jatqanda adamdardyń pikirlerine súıengenim joq. Sebebi, bul meniń otbasym, meniń qarym-qatynastarym. Jáne ekrannyń ar jaǵyndaǵy eshbir adam meniń ómirimmen ómir súrmeıdi”, – dep qorytty.