Jaqynda ǵana "Esquire" jýrnalyna tanymal mýzykant Ǵalymjan Moldanazar bergen suhbatty "Qamshy" portaly qazaq tiline aýdaryp, oqyrman nazaryna usynady:
Eger bir bedeldi adam belgili bir mýzykant jaıly maqtap jaqsy pikir aıtsa, ony bári jappaı tyńdaı bastaıdy. Alaıda kimdi jáne qandaı áýendi tyńdaý kerektigin adam óz talǵamyna súıenip sheshýi kerek. Bul bizdiń ortaq máselemiz.
90-shy jyldary Ózbekstan men Túrkıadan kelgen áýenderge baılanysty jurttyń mýzykalyq talǵamy buzylǵan.
Fonogram jaıynda uzaq talqylamaı, jaı ǵana fonogramǵa zańmen tyıym sala salý kerek. Jandy áýennen adam kóbirek energıa, rýhanı azyq jınary sózsiz.
Qazaqstandaǵy shynaıy talanttardyń zaman-ýaqyty bir kúni keledi. Birden emes. Ońaı soqpasy anyq.
Shyǵarmashylyq adamǵa azaptanǵan, muńaıǵan paıdaly. Ásirese, mahabbat taýqymetinen. Mahabbat salǵan jarany jazamyn, jyrlaımyn degende ádemi án-áýen dúnıege keledi.
5-6 jasymda sýretshi bolýdy armandaıtynmyn. 9 synypty bitirgen shaqta kórkemóner mektebine oqýǵa tústim. Biraq sýretshi bolý qolymnan kelmedi.
Prodúser degen menińshe artısiń beınesin qalyptastyratyn, stılin oılastyryp, ánshige áýen jazyp beretin adam. Bul turǵyda maǵan prodúser kerek emes. Ánniń sózin de jazamyn, ánniń aranjırovkasyn da ózim jasaımyn. Al, bet-beınem bolsa qalyptasqan.
Ataq-dańq pen aqshadan qorqamyn. Sebebi olardy qaıtpekpin degen suraqtyń jaýabyn áli tappadym.
Baı adamnyń únemi materıaldyq dúnıeni oılaı berýi shart emes. 10 dollarlyq djınsy shalbar satyp alyp kıetin mıllıonerler bar emes pe?!
Aqsha eshqashan artyq bolmaıdy. Eger saǵan olar kerek bolmasa, muqtajǵa kómektes.
Men adamdardy bólip jarmaımyn. Qazaq tilin bilmeıtinder bilmestigi úshin kináli emes. Oǵan sebepteri bar.
"Qazaq jalqaý halyq" degen ańyzdy unatpaımyn. Mundaı psıhologıany kim oılap tapqanyn bilmeımin. Eger adam ózi jaıly jaman oılasa, sondaıǵa aınalyp ketedi.
Mektepte nashar oqyǵanyma, ómirimde bir kitap taýyspaǵanyma uıalamyn.
Men ósken ortada barlyǵy taza qazaq tilinde sóıleıtin. Áke-sheshem de jalpaq tilmen áńgimelespeıtin. Ákem urysqanda da aıtar sózdi muqıat tańdaı biletin. Sol sebepti urys estigende júregińde tesik paıda bolǵandaı sezim týatyn. Óleń shyǵara alatynym da sondyqtan.
Qazaq tilin búkil jer-jahan estise degen armanym bar. Án arqyly sol armanyma qol jetkizýge endi múmkindigim bar.
