Resmı saparmen Saýd Arabıasy Koróldigine kelgen Nursultan Nazarbaev Medına qalasynda  provınsıa gýbernatory Hanzada Feısal ben Salman Ál Saýdpen ekijaqty kezdesý ótkizdi, dep habarlaıdy "Qamshy" portaly Prezıdenttiń baspasóz qyzmetine silteme jasap.

Budan bólek, Memleket basshysy Medına qalasyndaǵy Muhammed paıǵambar meshitine baryp, namaz oqydy, sondaı-aq Masdjıd án-Nábaýı meshitiniń sáýletimen jáne ıntererimen tanysty.

Odan keıin Qazaqstan Prezıdenti Saýd Arabıasy Koroli Salman ben Ábdel Ál Saýdpen kelissózder nátıjesi boıynsha birqatar ekijaqty qujattarǵa qol qoıý josparlanyp otyrǵan Er Rıad qalasyna keldi.

Sapar barysynda Saýd Arabıasy Koróldiginiń taǵy birqatar resmı tulǵalarymen jáne isker toptary ókilderimen kezdesý ótkizý qarastyrylǵan.

Esterińizge salsaq, Qazaqstan Prezıdentiniń Saýd Arabıasynda 24 jáne 25 qazanda resmı saparda bolatyny habarlanǵan bolatyn.

Buǵan deıin, 21 qazanda Nazarbaev BAE Abý-Dabıdiń taq muragerimen kezdesken edi. Sondaı-aq, sapar aıasynda, Aqorda Elbasynyń Qasıetti Mekke jerine alǵashqy sapary týraly qundy beıne materıaldy jarıalaǵanyn habarlaǵan bolatynbyz.