Aqtóbe oblysynyń Qarǵaly aýdanynda fızıka pániniń muǵalimimen sózge kelip qalǵan 11-synyp oqýshylary ony ońdyrmaı sabap ketken, dep habarlaıdy Qamshy.kz Baq.kz saıtyna silteme jasap.

Jas muǵalimmen jaǵa jyrtysqan túlekterdiń úlgerimi jaqsy, jaman qylyqtarymen buǵan deıin kózge túsip kórmegen, deıdi Arynov atyndaǵy orta mektep qyzmetkerleri.

Negizi, muǵalim men joǵary synyp oqýshylary arasyndaǵy tóbeles ótken aptada bolǵan. Sońy tóbeleske ulasqan kıkiljińnen muǵalim qoly synyp aýrýhanaǵa túsipti.

«Oqıǵa sabaq aıaqtalǵannan keıin tústen keıin boldy. 11-synyp oqýshylary bizde birinshi aýysymda oqıdy. Tóbeleske qatysqan tórt oqýshy. Janjaldyń neden týǵanyn biz bilmeımiz. Qazir bul máselemen polısıa aınalysyp jatyr. Jas mamannyń mektepke kelgenine eki-aq aı boldy. Oqıǵaǵa qatysy bar oqýshylar buǵan deıin eshqandaı esepte turmaǵan, báriniń úlgerimi jaqsy. Tóbeleskenderi jaıynda estigende, ózimiz tańǵaldyq. Muǵalim aýrýhanada jatqan joq, turyp júr, biraq qolynda gıps. Ázirge jumysqa shyqqan joq, «bolnıchnyıda». Balalar sabaqqa kelip júr. Olardyń ata-analarymen kezdestik, oqýshylar muǵalimnen keshirim surady. Ol olardy keshirgen sıaqty», - dep bolǵan jaıt týraly aıtyp berdi mektep dırektorynyń orynbasary Bıbinur Qabatbergenova.

İİD-dan habarlaǵandaı, qazir oqıǵanyń mán-jaıyn polısıa qyzmetkerleri anyqtap jatyr.