Ekonomıka jáne búdjetti josparlaý vıse - mınıstri Mádına Ábilkasymova oralmandardyń 76 paıyzynyń joǵary bilimi joq, kópshiligi múldem saýatsyz, sondyqtan Qazaqstannyń eńbek naryǵy biliksiz mamandarmen tolyǵyp jatyr dedi. "Taıaqtyń bir ushy" ózderine tıetinin bilmeıtin, bul neǵylǵan vıse-mınıstr? Oılanbaı sóılegen degen osy! "Kóshi qon týraly" Zańǵa 2006 jyly engizilgen ózgeriske sáıkes elge oralyp jatqan qandastarymyz aldymen Beıimdeý (adaptasıa)ortalyqtarynda túrli prosedýralardan ótýi tıis. Onyń ishinde olardy qajetti kásipterge beıimdeý, qaıta oqytý da bar . Jáne de munyń barlyǵy tegin júrgizilýi kerek. Qazirgi jaǵdaıda Mádına hanymnyń mınıstrligi ásirese soltústik oblystarǵa asa qajetti mamandyqtarǵa monıtorıń jasap, oralmandardy soǵan daıyndaýǵa qarjy bólýi tıis. Mádına hanym Izraılge, Germanıaǵa, Gresıaǵa kóship barǵan mıgranttardyn barlyǵy birdeı bilimdi bolmaǵanyn bilip alǵany jón. Olar sol elderdegi Beıimdeý ortalyqtarynan qajetti kásipti ıgerip shyqty. Al, bizdegi Beıimdeý ortalyqtarynyń aty bar da zaty joq. Osynsha jylda qansha oralmandy jańa kásipke daıyndaǵandaryn, oǵan qansha qarjy ketkenin vıse-mınıstrden meniń de bilgim keledi.