PÁ jetekshisi Jaqsybekov keıbir mınıstrliktiń shtatyn qysqartý týraly aıtty dep habarlaıdy «Qamshy» portaly QazAqparatqa silteme jasap. Bul týraly Jaqsybekov QR Memlekettik qyzmet isteri jáne sybaılas jemqorlyqqa qarsy kúres agenttiginiń búgingi keńeıtilgen májilisine qatysqanda aıtqan. Prezıdent Ákimshiliginiń basshysy Ádilbek Jaqsybekov uzaq ýaqyt boıy bos oryndardy ustap, jumysqa adam almaı jatqan mınıstrlikterdi synǵa aldy. Onyń oıynsha, atalǵan memlekettik organdar rezervte bar adamdardy qyzmetke qoıýǵa asyqpasa, ondaı vedomstvonyń shtatyn qysqartýǵa ábden bolady.
"Maǵan túsken aqparatqa sáıkes, "A" korpýsyndaǵy vakanttyq qyzmetterge (basshylyq - avt.) adam taǵaıyndaý jumysy durys júrgizilmeıdi. Qazirgi kezde rezervtiń baryna qaramastan, 16 laýazym áli de bos tur. Tórt aı boıy alty birdeı mınıstrlikte 8 komıtettiń tóraǵasy áli taǵaıyndalmaı otyr. Al osy qyzmetke úmitkerlerdiń rezervi 39 adamdy qurap otyr", - dedi Á.Jaqsybekov.
Onyń aıtýynsha, memlekettik qyzmet salasynda mamandardyń jıi aýysýy basty problemalardyń biri. Soǵan qaramastan, qarjy mınıstrliginde 970 qyzmet orny bos tursa, ulttyq ekonomıka mınıstrliginde - 900-den astam, al aýyl sharýashylyǵy mınıstrliginde 280 qyzmetke áli adam ala qoımaǵan. Oblystyq jáne aýdandyq ákimdikterde de solaı.
"Negizi, bos turǵan jumys oryndarynyń kóptigi, basshylardyń jıi aýysýy memlekettik qyzmet apparatynyń jumysyna keri áserin tıgizip otyr. Bizge osyny jan-jaqty zerdelep shyǵý qajet. Qazirgi jaǵdaıǵa ne sebep boldy? Nege ol oryndar bos tur? Bálkim, sol mınıstrlikterdiń shtatyn qysqartamyz. Sonyń arqasynda biraz aqshany únemdeýge bolady", - dep atap kórsetti Prezıdent Ákimshiliginiń basshysy.
Esterińizge sala ketetin bolsaq, Elbasy 2013 jyly 23 maýsymdy Memlekettik qyzmetkerler kúni etip jarıalady.
Ádilbekov sózinde, memlekettik qyzmetkerlerdiń etıkasy týraly da aıtty. «Memlkettik qyzmetker etıkasyna qatań nazar bólý kerek. Memleket basshysynyń Jarlyǵymen memlekettik qyzmetkerdiń Ádep kodeksi bekitildi, memqyzmetkerlerdiń ádebin baqylaıtyn arnaıy qyzmetter engizildi, ortalyq jáne jergilikti ózin-ózi basqarý organdarynda ádep jónindegi keńester quryldy. Qazir memlekettik qyzmetkerler halyqtyń qatań baqylaýynda jumys istep jatyr. Bári sol sátte ǵalamtor nemese áleýmettik jelige túsip ketedi», - dedi Á.Jaqsybekov.
2016 jyldyń 1 qańtaryna sáıkes, elimizde memlekettik qyzmetkerlerdiń jalpy sany 98 886 adamdy quraǵan.
Sondaı-aq, Qazaqstanda sońǵy aılarda birneshe mınıstrlik qaıta quryldy jáne jańa mınıstrlikter qurylǵan bolatyn.
