Astana qalasy İİD Jergilikti polısıa qyzmetiniń basshysy, polısıa polkovnıgi Baqytjan Malybaev máslıhat depýtattarymen kezdesý kezinde polıseılerdiń para alýynyń negizgi sebepterine toqtaldy, dep habarlaıdy Qamshy.kz Vaq.kz saıtyna silteme jasap.

«Jol-patrýldik polısıasynyń qyzmetkerleri kóshede bireýdi toqtatsa, olar para usynatyny jasyryn emes. Shynymen de qyzmetkerler jemqorlyqqa jol berip jatady. Qazaqta: «Altyn kórse perishte joldan taıady» degen sóz bar. Olar únemi osyndaı jaǵdaıǵa tap bolatyny sondyqtan», – deıdi Baqytjan Malybaev.

Onyń aıtýynsha, Astanada jyl basynan beri para alǵan 12 qyzmetker jumysynan qýylǵan.

«Men óz qyzmetkerlerimdi qorǵap jatqan joqpyn. Jalpy, bıylǵy jyldyń 9 aıynda Astanada 280 myń ákimshilik quqyq buzýshylyq tirkeldi. Onyń 12-si para alǵan polıseılerge qatysty. Endi sol 280 myńnyń 12-sin paıyzǵa shaqqanda kórsetkish óte tómen ekeni belgili. Biraq men jaýapkershilikten qashpaımyn. Osy turǵyda jumys istep jatyrmyz», –deıdi polısıa qyzmetiniń basshysy.

informburo.kz portalynyń málimetinshe, Baqytjan Malybaev polıseılerdiń para alýyna jalaqynyń tómen bolýy da sebep bolyp otyrǵanyn aıtqan.

«Kún saıyn jalaqyny kóterý qajet ekenin aıtyp kelemiz. İshki ister mınıstrligine usynys jasadyq. Eń bolmasa ákimshilik qoldasa jaqsy bolar edi. Serjant qyzmetindegiler 55-60 myń teńge kóleminde alady. Al kóp jyldyq tájirıbesi barlardyń jalaqysy 80 myńnan aspaıdy. Olardyń deni páter jaldap turady», – deıdi ol.

Jalaqy tómen bolǵandyqtan kadr tapshylyǵy bar eken. Onyń aıtýynsha, Astana qalasy İİD Jergilikti polısıa qyzmetine 218 maman qajet.